Zebrabidea estreinatu du Okin Zuri auzoak, bideko segurtasuna hobetzeko

Ermuko Okin Zuri auzoak espaloi berri-berria du duela aste gutxitik, ermuarrak herriko zonalde horretan segurtasunez ibili ahal izateko. Pixkanaka obrako azken ukituak egiten ari dira langileak: atzo, osteguna, auzoko erabilera anitzeko pistaren parean zebrabidea pintatu zuten. Horrela, bihurgunetik urrun, oinezkoek segurtasunez eta ikusgarritasun gehiagorekin gurutzatu ahal izango dute bidea.

Espaloia eraikitzeko obrak urtarrilaren amaieran hasi ziren; aurrez, ezponda egonkortzeko indusketa lanak egin eta saneamendua biltzeko hodia lurpean kokatu dira.

Orain, ingurua urbanizatzen ari dira: zonaldeari dagozkion trafiko seinaleak kokatu dira jada, eta gutxi barru farolak jarriko dira bidea argitzeko. Espaloiaren inaugurazio ofiziala asteartean izango da, apirilaren 19an, 12:00etan.

Proiektua hainbat erakunderen arteko elkarlanari eta kolaborazioari esker gauzatu da: Uraren Euskal Agentzia –URA-, Bizkaiko Foru Aldundia eta Ermuko Udala koordinaturik aritu dira lanean, ermuarren beharrari erantzuna emateko.