Ia bi milioi euroko diru-laguntzak eta aurrezkiak Ermua hobetzen jarraitzeko

Ermuko Udalbatzak aurrekontuan egingo diren bi aldaketaren berri eman du uztailaren 21ean egindako Osoko Bilkura saioan. Bi aldaketak dekretu bidez zehaztu dira, eta udalerrian helburu ezberdinak lortzeko errekurtso gehiago izateko aukera ahalbidetzen dute.

Lehenik, 1633/2016 Dekretua Udal Aurrekontuaren 3. aldaketari lotuta doa, eta 1.080.250 euroko kreditu gaikuntza hartzen du bere barne. Kopuru hori Eusko Jaurlaritzak emandako diru-laguntza da, formazio, ekintzailetza eta lehiakortasun arloetan bultzatzen diren planak eta ekintzak aurrera eraman ahal izateko.

Carlos Totorika alkateak azaldu duenez, “oso positiboa” da enplegu arloan ezartzen diren helburuek babesa izatea, eta jasotako laguntza, hein handi batean, ekintzailetza programa ezberdinak garatzeko erabiliko dela zehaztu du.

Bestalde, 1772/2016 Dekretuak aurreko urteetan gelditutako soberakinetatik eta aurrezkietatik egungo aurrekontuari errekurtsoak gehitzeko aukera ematen du. Horrela, Ermuko Udalak 890.901 euroko kreditu gehigarria eskuratu du Udalbatzak beharrezkotzat jo dituen hainbat gasturi aurre egin ahal izateko.

Guztira hamasei ekintza burutuko dira aipatutako kopuruarekin, eta honakoak izango dira:

• 372.328 euro: Udalkutxa 2015era dirua itzultzea. Kopuru honekin, aurreko urteko likidazio negatiboa erabat berdinduta gelditzen da.
• 194.676 euro: GHKk altan dauden hondakinak jaso eta garraiatzea.
• 55.397 euro: Unamuno Gizarte Zentroa konpontzea.
• 50.000 euro: Erdikokale 5 eraikina erostea.
• 45.000 euro: Oinezkoentzat bideetan zoladura jartzea.
• 28.000 euro: Zaharren Egoitzaren egitura indartzea eta itoginak konpontzea.
• 22.000 euro: Betiondoren inguruko salerosketak eragindako gastu juridikoak.
• 20.000 euro: Enplegu Planeko pertsonen soldatak.
• 20.000 euro: Gizarte Larrialdiko Laguntzak jasotzen dituzten familiei transferentzia arruntak.
• 20.000 euro: Gizarteratzeko Udal Laguntzak jasotzen dituzten familiei transferentzia arruntak.
• 15.000 euro: Ikerketa eta lan teknikoak. Herriko ingurune akustikoak mugatzea.
• 13.500 euro: Herriko ezpondak mantentzea: konponketak eta hormak.
• 12.000 euro: Kabialde inguruan lurrak erostea (Ongarai gaina).
• 10.000 euro: Auzoak urbanizatzea – Forjako plaza.
• 10.000 euro: Enplegu Planeko langileen Gizarte Segurantza.
• 3.000 euro: Dorre aldamioa eta segurtasunerako materiala erostea.

Osoko Bilkuran aldaketen inguruan egindako aurkezpena ikusi dezakezue jarraian duzuen bideoan, gai-zerrendako bosgarren puntutik aurrera.