Zerukoako eskailera mekanikoetako bigarren zatia, geldirik mantentze lanak direla eta

Zerukoa inguruko bizilagunak jada ohartuko ziren kale horretan dauden eskailera mekanikoetako bigarren zatia geldirik dagoela atzotik, astelehena, irailak 19. Eskubanda apurtu izana da zerbitzuaren etenaren arrazoia, eta berria jartzeko lanetan ari dira.

Thyssenkrupp enpresa arduratzen da Ermuko eskailera mekanikoen mantentze lanetaz, eta matxura atzo gertatu zela adierazi du. Halaber, eskubanda erabileragatik apurtu dela azaldu du, eta ez gaizki tratatu izanagatik.

Instalazioa geldirik dago, esan bezala, eskubanda berria jarri bitartean. Enpresak uste du gaur eta bihar artean eskailerak berriro normaltasunez funtzionatuko duela.

Bestalde, Thyssenkrupp enpresak eskailera mekanikoen gainontzeko tramuetan ere ikuskapen sakona egiteko aprobetxatu du unea, balizko matxurak topatzeko. Horrela, hilero errebisioak egingo dituela adierazi du, eskubandak gomendatutako erabilera betetzen dutela ikusi arte.