StradivariaS II, musikaz eta umorez betetako kontzertua

Lau pertsonaia, lau birtuoso eta, gauza guztien gainetik, lau diva izango ditugu bisitan ostiral honetan Ermua Antzokian. StradivariaS II musika, antzerkia eta umorea uztartzen dituen ikuskizuna da, eta ahaztezina izateko asmotan iritsiko da geurera.

StradivariaS II antzezlanak musika klasikoa eta abesti ezagunak mundu guztiarengana gerturatu nahi ditu, baita txikienengana ere. Kontzertu arrunt bat izan ordez, gaitasunen lehiaketa bihurtuko da ikuskizuna, emozioz eta irribarrez betea. Izan ere, laukote xelebre honetan abeslari erdi itsu bat topatu dezakegu, baita kontrabaxu ninja bat, panpina flamenkoak eta eskuzko okarina ere, besteak beste.

Ikuskizunean zehar, lau divek Schubert eta Policeren abestiak joko dituzte, Beethoven eta Stevie Wonderrenak, Rossini eta Queenenak eta Pergolesi eta The Plattersenak. Horrela, emanaldi berean kopla, bluesa, rocka, soula, barrokoa eta popa uztartuko dituzte, eta gainera, abestu, dantza egin eta ikusleak eurenganatuko dituzte amarru argiekin eta gaitasun musikal bereziekin.

Almasoul konpainiaren lana Eduardo Ortega Egeak zuzendu du, eta Melissa Castillo (biola), Irene Rouco (biolontxeloa), Inma Pastor (kontrabaxua) eta isaac M. Pulet (biolina) ditu protagonista. Obra antzezten duten lau pertsonek musikaren munduan ikasketa bereziak dituzte, baita antzerkian esperientzia zabala ere.

• StradivariaS II prentsa dossierra

StradivariaS xelebreak ostiral honetan, urriak 21, 22:15ean, iritsiko dira Antzokira. Sarrerak salgai daude 10 euroren truke Lobiano Kulturgunean, BBKren orotarako kutxazainetan, Kutxabanken webgunean edota, ikuskizuna hasi baino ordubete lehenagotik, Ermua Antzokiko leihatilan.

Lerro hauen azpian ikusi dezakezue antzezlanaren trailerra.