'Muñeca de Porcelana' antzezlana ostiralean Ermua Antzokian

David Mameten Muñeca de Porcelana (China Doll) antzezlana aurkeztuko da ostiralean, hilak 9, gaueko 22.15ean Ermua Antzokian. New Yorken aurkeztu ostean, antzezlana Espainiara heldu da aurrenekoz, Juan Carlos Rubio zuzendariaren gidaritzapean eta José Sacristán eta Javier Godino aktoreak oholtza gainean. Elkarrizketan oinarritutako lana da, interpretazioaren indarra hitzak esatetik igarotzen da.

Muñeca de Porcelana, egun ezarrita dauden botereak eta horien inguruan dagoen laguntasuna kritikatzen ditu, baita egungo munduan agintzen duen ustelkeria ere.Mametek emozioz eta bizitasunez jositako antzezlana sortu du. Hainbat gai lantzen ditu autoreak, politikaren boterea, ekonomia eta komunikazio medioak esate baterako, baina azken lan honetan, leialtasunarekin eta egun gizakiak iraganarekin mozteko dugun zailtasunarekin nahastu ditu.

Dirudun batek hegazkin bat erosi dio bere emaztegai gazteari ezkon-opari. Jubilatzeko eta emaztearekin egoteko asmoa du. Emaztegaiarekin elkartu aurretik bulegoan egin zuen azken egunean, negozio nola eraman erakutsi zion bere laguntzaile gazteari, bertan egon beharrik gabe negozioa urrutitik artatu ahal izateko. Irten aurretxoan, hain zuzen, azken orduko dei bat jasotzen du, inoiz jaso nahi ez zuena.

Ostiral gauaz disfrutatzeko aukera ezin hobea. Sarrerak 15 euroren truke daude salgai Lobiano Kultur Gunean, BBKren orotariko kutxazainetan, Kutxabanken webgunean edota, obra hasi baino ordubete lehenagotik, Antzokiko leihatilan.