Narco sevillarrak buru larunbatean, Vértigo Rock jaialdiaren XI. edizioan
Vértigo Rock jaialdiaren hamaikagarren edizioa ospatuko da larunbat honetan, maiatzak 20, Ermuan. Gustu ezberdinetarako proposamenak biltzen ditu aurtengo kartelak, eta kokapena estreinatuko du, gainera. Izan ere, San Pelaio plazatik Betiondo ingurura eramango da aurten jaialdia, eta arratsaldetik hasita festa izango da bertan nagusi.
Ekitaldiaren antolatzaileek kartel berean tokiko taldeak eta jada ibilbide luzea dutenak uztartu dituzte. Esaterako, Narco rap metal seikote sevillarra izango da aurtengo jaialdiko talde nagusietako bat, KOP kataluniarren hardcore punkarekin batera. Rat-Zinger bilbotarrek, Stai Zitto ermuarrek eta Kokein eibartarrek ere ikusmin handia piztuko dute Betiondon.
The Vartools eibartarrek zabalduko dute jaialdia 16:30etik aurrera, eta festak beste ia hamabi orduz jarraituko du Vértigo Rocken. Black Redding (Ermua), Fear Crowd (Bilbo) eta The Guilty Brigade (Iruña) taldeek osatzen dute hamaikagarren edizio honetako kartela.
Beti Txarto elkarteak antolatzen duen jaialdiak Ermuko Udalaren eta herriko tabernarien babesa du. Urtero bezala, sarrera doakoa da, eta eszenatokiaren inguruan jateko eta edateko postuak kokatuko dira. Gainera, antolatzaileek gogorarazten dute herrian bertan hainbat aukera ezberdin daudela afaltzeko.
Aurtengo edizioko ordutegiak honakoak dira:
- 16:30: The Vartools
- 17:30: Black Redding
- 18:30: Fear Crowd
- 19:30: The Guilty Brigade
- 20:30: Kokein
- 21:45: Rat-Zinger
- 23:25: Narco
- 01:20: KOP
- 03:00: Stai Zitto
Informazio gehiagorako, ikus ezazu Vértigo Rocken orrialdea.