Udalbatzarrak Ezohiko Osoko Bilkura izango du astearte honetan

Udalbatzarra bihar asteartea, uztailak 4, ezohiko Osoko Bilkurarako batuko da 19:00etatik aurrera Ermuko udaletxean. Saio horretan, eguneko gai zerrendan jaso diren bederatzi puntuak landuko dira.

Ohikoa den moduan, bertaratutakoei gai-zerrendako edozein punturekin zerikusia duten gauzak jakitera emateko aukera eskainiz hasiko da saioa, eta jarraian, ekainaren 1eko eta 13ko saioei dagozkien aktak onartuko dira.

Segidan, Alberto García-Abad Sánchez hautagaiak Se Puede Ermua Ahal Da alderdiko zinegotzi kargua hartuko du, Oiane Suárezek duela hilabete batzuk utzitako postua betetzeko. Gero, zinegotziek honako puntuen inguruan bozkatuko dute: Goitondo Industrialdean zuntz optikoa hedatzeko Mallabiko Udala eta Ermuko Udalaren arteko hitzarmenaren Eranskina onestea; zinegotziei bularra emateko baimena eta beste eskubide batzuk aplikatzeko modua onestea; eta ostalaritzako eta jolas jardueretarako establezimenduen instalazioa eta jarduera arautzen duen udal ordenantza hasierako izaeraz onestea.

Saioa amaitzeko, Kreditu-transferentzia bidez aurrekontua aldatuko da eta egon daitezkeen eskari-galderak erantzungo dira.

Osoko Bilkurari buruzko informazio guztia eta eskuragarri dagoen dokumentazioa esteka honetan topa dezakezue.