‘Cazafantasmas’ filmaren eskutik amaituko da udako zinea

Umorez, dramaz, animazioz eta abenturaz betetako zazpi saioren ostean, Ermuko udako zine programazioak agur esango digu gaur, asteazkena, abuztuak 30, denboraldiko azkenengo zine saioarekin.

Duela astebete iragarri genuen moduan, programazioak azken orduko aldaketak izan ditu, eta Ermuko Udaletik at dauden banaketa arazoak direla eta, La ciudad de las estrellas: La La Land filma ezingo da eskaini, aurreikusita zegoen moduan, gaurko azkenengo emanaldian.

Haren ordez, Cazafantasmas film ezagunaren azkenengo bertsioa, 2016an estreinatua, ikusteko aukera izango dugu. Paul Feig zuzendari estatubatuarraren lan honetan, Melissa McCarthy, Kristen Wiig, Kate McKinnon, Leslie Jones, Cecily Strong eta Chris Hemsworth aktoreak ditugu protagonista.

Filmaren emanaldia 22:00etan hasiko da Orbe Kardinala plazan. Euria eginez gero, proiekzioa Santiago Apostoluaren parrokiako aterpeetara eramango da. Udako zine eskaintza guztiak bezala, hau ere doakoa izango da.

Sinopsia

Manhattan, New York. Hogeita hamar urtez euren berririk izan ez arren, mamuek eta deabruek berriro infernutik ihes egin dute hiria suntsitzeko asmoz. Oraingoan, lau emakumek osatutako Mamu-harrapari talde berriak aurre egingo dio edozein motatako mamu mehatxuri.