'Oleanna' antzezlana ikusgai ostiral honetan Ermua Antzokian

Carol unibertsitateko ikaslea da, eta bere irakaslearen bulegora joango da ikasgai bateko nota igotzeko eskatzera. Planteamendu sinple horretatik abiatzen da Oleanna, David Mamet idazlearen lanik aztoratzaileenetako bat, eta ostiral honetan antzezlan formatuan ikusteko aukera izango dugu gure herrian.

Oleanna bi pertsonen arteko botere-borrokari buruzko istorioa da. Hori bai, borroka amorratua, sexu-jazarpena nahasten duena, egungo sistema akademikoa zalantzan jartzeaz gain, begiratu batean dirudiena baino gehiago dagoela aditzera emateko, egia ezkutu bat agerian jarri nahian. Autoreak azaldu nahi du bi pertsonaiak erratuta daudela, baina aldi berean arrazoia dutela, tentsiodun hitzezko borroka piztuz.

Fernando Guillén Cuervo eta Natalia Sánchez aktoreak ditu protagonista Luis Luquek zuzendutako antzezlanak. Jatorrizko lana 1992. urtean aurkeztu zen, gizartearen matxismoa salatzeko asmoz. Jesús Cimarro ermuarrak ekoiztu du 90 minutuko ikuskizuna, Pentación Espectáculos, El Cuervo eta Txalo Produkzioaken eskutik.

Antzezlana ostiral honetan aurkeztuko da, abenduak 22, 22:15etik aurrera Ermua Antzokiko eszenatokian. Sarrerak salgai daude jada 12 euroren truke Lobiano Kulturgunean, BBKren orotarako kutxazainetan, Kutxabanken webgunean eta, ikuskizuna hasi baino ordubete lehenagotik, Ermua Antzokiko leihatilan.