Kattalin Miner idazlea apirileko irakurketa klubeko saioan izango da

Udal liburutegiak antolatzen duen euskarazko irakurketa klubak gonbidatu berezi bat izango du apirileko saioan: Kattalin Miner, taldekideek azkeneko asteetan irakurri duten Nola heldu naiz ni honaino liburuaren egilea, hain zuzen.

Kattalin Miner (Hernani, 1988) kazetaria eta militante feminista da. Nola heldu naiz ni honaino (Elkar, 2017) bere lehenengo eleberria da, eta Igartza saria lortu izanari esker kaleratu du. Lan horretako protagonista, Jezabel, arrakasta handiko emakumea da, eta erabakiak hartzera ohituta dagoen arren, itxuraz garrantzirik gabekoak diren eguneroko erabakiez estututa sentituko da. Jazoera horien bidez, idazleak bere belaunaldiaren argazkia aurkezten du.

Hitzordua datorren astelehenean, apirilak 9, 19:30etik aurrera izango da Lobiano Kulturgunean, eta sarrera librea da.

Irakurketa kluba aldez aurretik liburu bera irakurri duten 15-20 petsonak osatzen dute. Irakurleak testuaz mintzatzeko biltzen dira hilean behin, iruzkinak egin, iritziak eman eta irakurketan bizitakoa adierazteko eta obraren testuinguruaz, gaiaz, autoreaz eta abarrez hitz egiteko.

Liburutegiak lortzen eta banatzen ditu irakurgaiak partaide guztien artean, eta euskarazko saioak Peru Magdalenak dinamizatzen ditu.