Innpulso Sareko Alkate Berritzaileen III. Topaketan parte hartuko du Ermuak

34 herri eta hiritako ordezkari bilduko dira gaur asteazkena, apirilak 25, Malagako Greencities Azokaren barnean izango den Alkate Berritzaileen III. Topaketan.

Innpulso Sareak Malagako Udalarekin elkarlanean antolatu du bilkura honen hirugarren edizioa. Horren helburu nagusia sareko hiri bakoitzak hautatzen dituen ETEei (enpresa txiki eta ertainak) eta mikroETEei ikusgarritasuna ematea da, kontaktu sarea osatu dezaten eta ekintzailetzaren bidean pausoak ematen jarraitu dezaten.

Ermuko Udalaren kasuan, Hapiick izan da ekitaldi honetan parte hartzeko hautatu den proiektua. Izarra Centren kokatzen da proiektu hori, eta komertzio elektronikoarekin lotutako logistika zerbitzuak eskaintzen ditu. Horri esker, erabiltzaileari bidalketak puntu seguru batean, modu erosoan eta nahi duen unean jasotzeko aukera ematen zaio.

Proiektua gaur asteazkena aurkeztuko da 13:40tik aurrera, ongi-etorri instituzionala jaso ostean. Bertan parte hartuko du Carlos Totorika Ermuko alkateak, Innpulso sareko ko-presidente gisa.

Ermuak, Etxebarrik eta Barakaldok osatzen dute euskal ordezkaritza jardunaldi honetan. Lekushare eta Gembira Tech, S.L. enpresak hautatu dituzte, hurrenez hurren, bi udalerri horiek.

Berrikuntza gisa, aurten Innpulso Sariak banatuko dira hiru kategoriatan: proiektu ekintzaile edo ETE berrintzaileena; etorkizunerako aukera gehien dituena; eta aurkezpen onena duena.

Irabazleak online bozketa baten bitartez hautatuko dira, Innpulso Sarearen webgunean bertan. Proiektu guztiak aurkeztu ostean izango da botoa emateko aukera, eta 17:00ak inguruan amaituko da. Orduan iragarriko dira irabazleak.