Gabonetako argiek Ermua piztuko dute asteartetik aurrera

Aurtengo Gabon kanpainako apaingarri eta argiak piztuko ditugu Ermuan datorren asteartean, abenduak 4. Iaz bezala, lehiaketa bidez kontratatu dira argiak, eta Ximenez Catalunya S.L.U. enpresari esleitu zaio 59.138,75 euroren truke, BEZ barne. Azken egunetan zehar aritu dira argi eta apaingarriak kokatzen, eta guztia pizteko prest dago jada.

Eguberritako kanpaina, beraz, astearte honetan hasiko da, abenduak 4, 17:30etik aurrera. Lehenik, Ermuko Merkatari eta Ostalarien Elkarteak (EMOEk) txokolatada eskainiko du Orbe Kardinala plazan, eta eguna iluntzen hasten denean, herri osoko argiak piztuko dira.

2018ko Gabonetako kanpaina honetan ia 200 elementu apaingarrik jantzi eta argituko dituzte Ermuko kaleak. Izarrak, estalaktitak, Zorionak kartelak, Olentzero, oreinak eta bolatxoak izango ditugu herriko hainbat puntutan urtarrilera arte, Errege eguna igaro arte, behintzat. Gipuzkoa eta Bizkaia Etorbideetan, Zubiaurren, Kaltxangon, Goienkalen, Izelaietan, Erdikokalen, Diputazion, VI. Mendeurrenan, Probalekun, Karabixan, Abeletxen, Ongarain, Aldapan, Sakonan, Zerukoan, San Pelaion, Okinzurin, Santa Anan, San Roken, San Isidron, Errebalburun, Sallabenten, Orbe Kardinala plazan, udaletxean eta Baldespina Markesa, Forja eta Goiko parkeetan izango dira ikusgai argiak.

Ekimen honekin Ermuko auzo guztiak pizten eta girotzen saiatu da Udala, guztiok ilusioz eta poztasunez betetako Gabonak igaro ditzagun.