PSE-EE/PSOE nagusi Ermuan Bizkaiko Batzar Nagusietarako Hauteskundeetan

Sozialistek botoen %33a eskuratu dute gure herrian, baina Durango-Arratia barrutian hirugarren indarra izango dira

Ermuko Hautesle Errolda osatzen dutenen %66,50ak parte hartu du igande honetan 2019ko Batzar Nagusietarako Hauteskundeetan. Toki Hauteskundeekin eta Europar Parlamentukoekin batera izan dira bozketak, eta %100a zenbatuta, PSE-EE/PSOE izan da nagusi gure herrian. 2.821 boto eskuratu dituzte sozialistek (%33a), 2015ean baino ia 400 babes gehiago (2.481).

Boto gehien jaso dituen bigarren alderdia EAJ-PNV izan da. Jeltzaleak ere hazi egin dira, eta 2015ean lortutako 1.339 botoetatik (%16,80) 2.170 babesetara (%26,02) igo dira.

EH Bildu izan da hirugarren indarra Ermuan, eta 1.232 boto eskuratu ditu (2015ean baino 174 gehiago), babesen %14,77a, hain zuzen.

Elkarrekin Podemos (Podemos+IU+Equo) ere Bizkaiko Batzar Nagusietan izango da, eta Ermuan 1.024 boto eskuratu ditu (%12,28).

PPk, aldiz, ehun boto inguru galdu ditu eta 844rekin gelditu da (%10,22); VOXek, bien bitartean, ez du gutxiengo boto kopurua eskuratu eta ordezkaritzarik ez du izango Batzar Nagusietan (118 boto, %1,41).

Datu guztiak Hauteskundeak atalean kontsultatu daitezke.

Ordezkaritza Batzar Nagusietan

Bizkaiko Batzar Nagusiak lau barrutitan banatzen dira. Ermua Durango-Arratia deituan kokatzen da, eta barruti horrek hamar ordezkari hautatzen ditu. Bertan, lehenengo indarra EAJ-PNV izan da, botoen %41,57 lortuta, eta 5 batzarkide izango ditu. Ondoren, EH Bildu izan da bozkatuena (%26,23) eta 3 ordezkari lortu ditu; PSE-EE/PSOEk ordezkari bat izango du (%15,16), eta Elkarrekin Podemosek ere beste bat (%10,25). Hauteskundeetara aurkeztu diren gainontzeko alderdi politikoak ordezkaritzarik gabe gelditu dira.

Datu guztiak Bizkaiko Aldundiaren webgunean kontsultatu daitezke.