Santa Zezilia Jaialdia izango dugu ostiral honetan Ermua Antzokian

Alboka Musika Eskolak eta Txindurri Dantza Taldeak Santa Zezilia jaialdia eskainiko dute ostiral honetan, azaroak 22, musikaren zaindariaren omenez. Ekitaldia 22:15ean hasiko da Ermua Antzokian. 

Sarrerak 3 eurotan daude salgai Lobiano Kultur Gunean, BBKren orotariko kutxazainetan, Kutxabanken webgunean eta, ikuskizuna hasi baino ordubete lehenagotik, Ermua Antzokiko leihatilan. 

Giroa berotzen joateko eta herria musikaren erritmora esnatzeko, Irulitxa Txaranga 7:00etan aterako da kaleetara Santa Zeziliako dianarekin.

Albokaren XXV. urteurrena

Ermuko Alboka Musika Eskola sortu zeneko XXV. urteurrena ospatzen ari da aurtengo ikasturtean zehar. Mende laurdena dela eta antolatutako ekitaldien artean, larunbat honetan kalejira alaia egingo da herriko kaleetan zehar. Ondoren, ikasleak, ikasle ohiak, irakasleak eta senitartekoak bazkarian elkartuko dira Merkatu plazan. 

Bazkarian parte hartzeko, musika eskolako idazkaritzan txartela erosi beharko da. Helduentzat 12 euroko prezioa izango du, eta haurrentzako menuak, aldiz, 8 euro.