Ipuin-kontaketa saioak ingelesez herriko ikastetxeetan

Ermuko Udal liburutegiak ingelesezko ipuin-kontaketa saioak antolatu ditu Lehen Hezkuntzako 4. mailako ikasleentzat, herriko ikastetxe guztiekin koordinatuta. Ekimen honek helburu bikoitza du: batetik, ahozko transmisioaren bitartez irakurketa sustatzea eta, bestetik, ingelesaren ikaskuntza indartzea haurtzarotik hasita.

Guztira 7 saio izan dira, eta ikastorduetan egin dira Anaitasuna Ikastolako, San Lorenzo Ikastetxeko, Ongarai Eskolako, Eskolabarriko eta San Pelayo ikastetxeko liburutegietan. 140 neska-mutil baino gehiagok parte hartu ahal izan dute ekimen horietan.

Aurreko ikasturtean bezala, Aidan Kilbride eta Charlie McGeorge ipuin-kontalariek dinamizatu dituzte saioak. Aurtengoan, Erdi Aroko musika eta jantziak erabiliz, Hamelingo txirularia ipuin klasikoaren bertsioa antzeztu diete kontalariek herriko ikasle gaztetxoei.

Liburutegiak ingelesezko ipuin-kontaketak antolatzen dituen hamabigarren urtea da jarraian. Ekimenak ikastetxeen eskaerei erantzuna ematen die, eta balorazio oso ona jasotzen du urtero bai irakasleen, baita ikasleen aldetik ere.