VI. Mendeurrena kaleko espaloiaren baranda kendu da, zabalera gehitzeko eta pertsonen arteko distantzia handitzeko

Behin-behineko neurria da osasun-krisiak irauten duen bitartean, bidegorria partekatzea ekarriko digu bizikletei eta oinezkoei

Obra eta Zerbitzuen udal-brigadak kendu egin du VI. Mendeurreneko espaloiko baranda, -Probaleku izkinatik Goiko parkearen sarreraraino-, zabalera handiagoa emateko eta oinezkook gutxieneko distantziari eutsi ahal izateko, Covid-19aren pandemiak eragindako osasun-krisian ezarritako osasun-gomendioei jarraiki. Hiri eta Hirigintza Arloak hartutako behin-behineko neurri bat da, tarte horretan neurriren bat hartzeko beharrari buruz herritarrek egindako zenbait proposamen jaso ondoren. Izan ere, tarte hori estua da, eta distantzia txiki bat mantentzea eragozten duten pertsonak gurutzatzeko momentuan. Estugune hori areagotu egiten da, zuhaitzen txorkoak eta zuhaitzen enborrak dauden hainbait puntutan.

Hainbat aukera aztertu ondoren, udal honek espaloia eta bizikletentzako erreia banatzen dituen baranda aldi baterako kentzea erabaki du. Autoen zirkulazio-bide edo erreiaren ondoan dagoen eta erantsiko den gune hori gorriz margotuta dago, eta erabilera partekatua eta mistoa izango du bi gurpilekin. Beraz, oinezkook, oro har, arreta areagotu beharko dugu puntu horretan, elkar errespetatu eta zuhurtziaz jokatu ibilgailuen trafikoari eta bizikleta-erabiltzaile posibleei dagokienez, bai eta espaloiaren, zintarriaren eta bizikleta-bidearen arteko altueraren desnibelari dagokionez ere.

Eremua seinaleztatu egingo da, jendeak horren berri izan dezan eta herritarrok berehala erabiltzen has gaitezen. Alkateak atzo jakinarazi zion Udalbatzari online bideokonferentziaren bidez, goizeko lehen orduan egindako Gai Orokorretarako eta Osokoak ezagutu beharreko gaien Informazio Batzordean. Covid-19ak edo koronabirusak eragindako osasun-krisiak irauten duen bitartean mantenduko da neurria.