Uretamendiko tunelak itxita egongo dira gaur gauean

Pasatu den astean mantentze lanetarako gau batez itxita egon ziren Uretamendiko tunelak, 634 errepide nazionala, Ermuko saihesbidea eta AP8 autobiderako sarrera lotzen dituztenak. Tunel horiek mantentzeaz arduratzen den enpresak jakinarazi duenez, gaur gauean ere itxi egingo dituzte azpiegitura horiek, bi noranzkoetan, asteazkena, apirilak 29, 22:00etan hasi eta osteguna, hilak 30, goizeko 06:00ak arte. Tarte horretan mantentze lanak egingo dira.

Hori horrela, egun eta ordutegi horretan ordainsarira edota AP8 autobidera sarrerara iritsi ahal izateko, Eibarko eta Ermuko saihesbideak lotzen dituen biribilgunea hartu beharko da Bizkaia Etorbidetik edo Sallabentetik, edo bestela, Areitioko mendatetik Iurretaraino jarraitu.

Indarrean dagoen alarma-egoeran eta biztanleentzako konfinamendu orokor honetan, kontserbazio-lan horiek ez dute eragin handirik izango, salbu eta gaueko txandara lanera doazenentzat edo arratsaldeko txandatik itzultzen direnentzat, ordutegi-tarte horren lehen unean.