Azken egunak 2021erako Aurrekontuetan parte hartzeko

2021eko Udal Aurrekontua zehazteko parte-hartze prozesua azken txanpan sartu da jada. Ermuko Udalak herritarren ekarpenak jasotzen jarraitzen du, datorren ekitaldirako herritarren lehentasunezko eremuak ezagutzeko. Hala, online inkesta urriaren 12ko 23:59ra arte egongo da indarrean.

Ekimena Ermuan erroldatuta dauden eta euren ideiak, iradokizunak eta lehentasunak aurkeztu nahi dituzten 18 urtetik gorako pertsonei zuzenduta dago. Aurreko urteetan bezala, prozesuan parte hartzeko hainbat modu eskaintzen dira: alde batetik, online galdetegia bete daiteke esteka honen bidez; eta, bestetik, papereko inkesta banatu da herriko etxebizitza guztietara. Hori Abiapuntu bulegoan, Lobiano Kultur Gunean, Udal liburutegian edo Miguel Angel Blanco kiroldegian entregatu daiteke, edo Correoseko postontzi batean utzi, frankeatu beharrik gabe.

Proposamenak jaso ondoren, ekarpen guztiak balorazio teknikoaren pean jarriko dira, eta 2021 Aurrekontuan sartzea, ezestea, azterlan gehigarrien zain uztea edo etorkizuneko jarduketetarako uztea erabakiko da. Izan ere, Covid-19aren pandemiak eragindako aparteko egoera dela eta, Udalak diru-sarreren jaitsiera nabarmena aurreikusten du, eta ezinbestekotzat jotzen du ermuarren ekarpenak izaten jarraitzea, inoiz baino garrantzitsuagoa baita 2021eko Udal Aurrekontuetarako lehentasunak ondo zehaztea.

Galdetegiarekin batera, informazio-liburuxka bat bidali da, Ermuko herritarrek 2020ko Aurrekontuetarako lehenetsitako esparruei eta ekitaldi honetan gauzatu diren jarduera garrantzitsuenei buruzkoa, batez ere Ermua Aurrera txoke-planari dagokionez.

• Ermua Aurrera informazio liburuxka