Konponketa lanak arrapala mekanikoen estalkietan

Ermuko Udaleko Hiria Alorrak herriko arrapala mekaniko ezberdinetan burutzen ari diren lanen berri eman du, horien estalkiak konpondu eta berritu ahal izateko.

Cristaleria Ermua enpresa da lanen esleipenduna, eta guztira 192 plaka ordezkatuko ditu Ongarain, Orbe Kardinala plazan eta Goienkale eta Iparragirre kaleak San Rokerekin lotzen dituen arrapala mekanikoetan. Lan horien exekuzio aurrekontua 22.840 eurokoa da, BEZ barne.

Obrak pasatu den abenduaren 21ean hasi ziren, zenbait estalki ekintza bandalikoen ondorioz apurtuta zeudela ikusi ostean. Azken asteetan lanak geldirik egon dira, eguraldia gora-behera, baina estalkiak ordezkatzen hasi dira berriro ere aste honetan bertan.

Estalkietarako erabiltzen ari diren materialak polikarbonato zelularreko plakak dira, 3,15 x 1,00 metrokoak eta 8 milimetroko lodiera dutenak. Horiei esker, euria egiten duenean ere, busti gabe erabili daitezke arrapala mekanikoak.

Ongaraiko instalazioetako estaldura plakak jada ordezkatuta eta berrituta daude, eta aurreikuspenen arabera, datorren otsailaren 5erako amaituko dira lan guztiak. Orain, Orbe Kardinala plazako arrapaletako berrikuntzekin hasiko dira, eta jarraian, Goienkaleko eta Iparragirreko instalazioekin.