Alberto eta Joaquinen omenezko ekitaldiak zabortegia erori zeneko lehen urteurrenean

Larunbat honetan, otsailaren 6an, Zaldibarko zabortegiaren hondamendiaren lehen urteurrena beteko da. Luiziak Alberto Sololuze eta Joaquin Beltran Verter Recyling 2000 enpresako bi langile lurperatu zituen, AP-8 autobidea eta Ermuko saihesbidearen zati bat inbaditzera iritsi ziren hondakin tonen azpian. Ondorengo suteek eta eremu horretan elementu toxikoak agertzeak zabortegiaren inguruko biztanle guztiak pil-pilean mantendu zituzten, biktimen familiek euren senideen galera pairatzen zuten bitartean.

Alberto Sololuzeren gorpua abuztuaren 16an aurkitu zuten. Baina zabortegia erori eta 365 egun igaro diren honetan, ingurumen hondamendiak Joaquin Beltranen gorpua ezkutatzen jarraitzen du, nahiz eta bilaketa lanak ez diren eten.

Bitartean, Durangoko epaitegiek zabalik dituzte Verter Recycling 2000 enpresaren eta haren hiru arduradunen aurkako auziak, ingurumenaren aurkako delituengatik. Ermuko Udala akusazio partikular gisa aurkeztuko da bertan. Zuhurtziagabekeriazko giza hilketa eta langileen eskubideen aurkako delituak ere egotzi dizkiete.

Zaldibar Argitu herri plataformak, bere aldetik, hainbat mobilizazio eta omenaldi deialdi antolatu ditu luiziak kaltetutako herrietan eta/edo auzitik gertu daudenetan, hala nola Ermuan, Eibarren, Zaldibarren, Elgetan, Zallan, Markina-Xemeinen eta Etxebarrian. Langileak, osasuna eta argitu beharreko erantzukizunak erdigunean jarrita, Alberto eta Joaquin gogoratuko dituzte, zabortegia eraitsi eta hil ziren lehenengo urteurrenean. Gure herrian, manifestazioa 17:30ean abiatuko da Zubiaurre kaletik.