Elikagaien karabana solidarioa Saharako errefuxiatuentzat

Rio de Oro Gobernuz Kanpoko Erakundeak elikagai bilketa kanpaina antolatu du Durangaldean, saharar errefuxiatuei babesa emateko, eta Ermuko Udalak bat egin du egitasmoarekin. 2021eko  Karabana Solidarioak formatu desberdina izango du aurten, bizi dugun osasun larrialdi egoera dela eta.

Kanpaina datorren otsailaren 12an amaituko da, eta aurten, herriko supermerkatuetan elikagaiak modu presentzialean bildu beharrean, dohaintzak egiteko bi bide prestatu dira. Jasotako diru guztia elikagaiak erosteko erabiliko da, eta Tindufeko (Aljeria) errefuxiatu-guneetara bidaliko da. Saharar herria duela 45 urtetik dago eremu horretan errefuxiatuta, eta haren egoera larriagotu egin da Marokorekin berriki izandako gerraren ondorioz.

Diru-bilketa bi bide hauen bitartez egingo da:

• 1. aukera: Rio de Oro Durangaldea elkartearen kontu-korrontera transferentzia egitea: ES90 3035 0129 11 1290034483 (Laboral Kutxa)
• 2. aukera: Bizum bidez. Horretarako, zabaldu aplikazioa, hautatu “Dohaintza egin” aukera eta topatu Rio de Oro Durangaldea 01955 kodearekin.

Dohaintzak hiru mota edo kopuru posibletan banatzen dira:

• 4 euro: horrekin kilo bat arroz, kilo bat pasta, kilo bat lekale eta kilo bat azukre erosiko dira.
• 8 euro: aurreko lote berberaz gain, konpresa pakete bat eta olio litro bat hartuko dira.
• 12 euro: aurreko bi loteei hiru atun lata eta sardina lata bat gehituko zaizkie.

Rio de Oro Gobernuz Kanpoko Erakundeak herritarrek emandako arroz edo lekale kilo horren esanahia azpimarratu nahi du, kilo bat elikagai baino zerbait gehiago delako: itxaropenaren, elkartasunaren, senidetzearen eta indarraren kilo bat ere bada.

Ermuko Udalak dei egiten die herritar guztiei saharar herriarentzat hain beharrezkoa den kanpaina honetan parte hartzera. Guztien artean, 24 tona inguruko laguntza humanitarioarekin trailer bat betetzea lortuko dugu, gehien behar duten lekura helarazteko.