Aurrematrikulazio kanpaina hasi da Ermua-Mallabia OLHUIn

Ermua-Mallabia Oinarrizko Lanbide Heziketako Udal Institutuak 2021/2022 ikasturterako aurrematrikulazio kanpainari hasiera eman dio. Prestakuntza hori, batez ere, Derrigorrezko Bigarren Hezkuntzako titulua lortu ez duten 15 eta 17 urte bitarteko gazteentzat da.

Irailean hasiko den datorren ikasturterako, honako espezialitateak prestatu dira:

• Ile-apainketako laguntzailea: ilea mozteko eta orrazteko teknikak, estetika – manikura, pedikura, makillajea eta depilazioa – eta masaje-teknikak.
• Ibilgailuak konpontzeko laguntzailea: mantentze-lanak, automobilen oinarrizko konponketa, gainazalak prestatzea eta osagarriak muntatzea.
• Elementu metalikoen fabrikazioko langilea: mekanizazioa eta muntaketa (tornua eta fresatzeko makina), metrologia eta egiaztapena, galdaragintza, arotzeria metalikoa eta soldadura eta elektronika.

Ermua-Mallabia OLHUIko prestakuntza-moduluek bi ikasturteko eta 2.000 orduko iraupena dute, eta horietatik 260 ordu lantokietako praktikei dagozkie. Oinarrizko Lanbide Heziketa gainditu ondoren, ikasleek hezkuntza-sistemaren barruan jarraitzea errazten du institutuak, erdi-mailako heziketa-zikloetara zuzenean sartzeko eta Derrigorrezko Bigarren Hezkuntzako graduatu-titulua lortzeko aukerarekin. Gainera, 1. mailako profesionaltasun-ziurtagiria lortu ahal izango dute ikasleek, lan-merkatuan sartzea errazten duena.

• Informazio triptikoa

Ate irekien jardunaldiak

Apirilaren 12tik 30era, Ermua-Mallabia OLHUIk ate irekien jardunaldiak egingo ditu, eta aurrez hitzordua eskatuta bisitatu ahal izango da zentroa. Bisita gidatua eskatzeko, deitu 943 17 54 27 telefono zenbakira edo idatzi mezu bat imfpb@udalermua.net helbide elektronikora.

Bestalde, bihar, osteguna, institutuak, Debegesarekin lankidetzan, eskualdeko Lanbide Heziketako ikastetxeekin online jardunaldi batean parte hartuko du. Jardunaldi horretan, inguruko prestakuntza-eskaintza guztia azalduko zaie Derrigorrezko Bigarren Hezkuntzako ikastetxeei. Ondoren, ikastetxeei galdetegi bat bidaliko zaie, prestakuntza horretan interesa duen ikaslerik izanez gero bete dezaten.