Udaleko kirol-instalazioetarako laguntzaileen lan-poltsa

Ermuko Udalak bere kirol instalazioetarako laguntzaile balioaniztunen lan poltsa bat sortzeko deialdia zabaldu du. Pertsona horiek Udaleko plantillako langileen aldi baterako beharrizanak beteko dituzte, eta hautaketa-prozedura lehiaketa bidez egingo da.

Hauek izango dira, besteak beste, balio anitzeko laguntzaileen zeregin nagusiak: giltzak eman eta jasotzea, instalazioak zaintzea, sarrerak, aldagelak eta sartzeko ateak kontrolatzea, telefono bidezko eta aurrez aurreko arreta eta informazioa ematea, eta abonatuen txartelak ematea.

Hautaketa-prozesu horretan parte hartu ahal izateko, beharrezkoa izango da Oinarrizko Lanbide Heziketako titulua edo Derrigorrezko Bigarren Hezkuntzako graduatua izatea, bai eta euskarazko 2. hizkuntza-eskakizuna (HE2) edo baliokidea ere.

Izen-emate epea

Hautaketa-prozesuan parte hartzeko eskabideak 10 egun balioduneko epean aurkeztuko dira, deialdia webgune honetan argitaratzen denetik aurrera; beraz, izena emateko azken eguna maiatzaren 24a izango da, astelehena. Eskabide-eredua hemen deskarga daiteke.

Eskabidearekin batera, NANaren fotokopia, merituen zerrenda eta agiri bidezko egiaztapena, eta lortutako ziurtagirien fotokopia (ikasketak eta hizkuntza-eskakizuna) aurkeztu beharko dira.

Hautaketa prozesua

Langileak hautatzeko prozesua merituak baloratzeko fase bakar batean egituratuko da, eta fase horretan hiru alor hartuko dira kontuan: esperientzia profesionala (gehienez 15 puntu), euskara egiaztatzea (gehienez 5 puntu) eta Omesa programa informatikoa ezagutzea (10 puntu).

Hautagaien merezimenduak baloratu ondoren, lan-poltsa osatzen duten pertsonen zerrendak argitaratuko dira, lortutako puntuazioaren arabera ordenatuta.

Deialdiaren oinarriak eta prozesuari buruzko xehetasun guztiak Ermuko Udaleko iragarki-taula digitalean kontsulta daitezke.