Ordutegi luzapena liburutegian, ikasturte amaierako azterketetarako

Ermuko Udal liburutegiak irekiera ordutegia luzatuko du bihartik, larunbata, maiatzak 8, datorren ekainaren 13ra arte, igandea. Horrela, nahi dutenek instalazioak denbora gehiagoz erabili ahal izango dituzte ikasturte amaierako azterketak prestatzeko.

Aipatutako bost aste horietan, larunbat eta igandetan 09:30etik 13:30era eta 16:00etatik 20:00etara egongo da zabalik liburutegia. Astelehenetik ostiralera, ohiko ordutegia mantenduko da: 09:30etik 20:30era, etenik gabe.

Maiatzeko larunbat goizetan, liburutegiko zerbitzu guztiak erabili ahal izango dira. Arratsaldeetan eta ekaineko asteburuetan, aldiz, ikasgela gisa soilik zabalduko dira instalazioak.