700 jostailu berri elkartasunezko Gabonak ospatzeko

Eibar eta Ermuko Gurutze Gorriak Jostailu Hezitzailea kanpaina hasi du ostegun honetan, Eskubideak jokoan lelopean. Ermuko eta Eibarko Udalek eta Eibar Kirol Erakundearen Fundazioak jostailu berriak biltzeko ekimena babesten dute, bazterketa arriskuan dauden haurrek Gabonetan jolasteko eskubidea izan dezaten.

Ekimen honen helburua da haur guztiek jolasteko duten eskubidea bermatzea, bai eta jolasak eta jostailuak hezkuntzarako eta balioak transmititzeko tresna gisa duten garrantziaz eta hezkuntza-garapenean duten eraginaz sentsibilizatzea ere.

Herritarrek jostailu berriak eman ahal izango dituzte, ez belikoak eta ez-sexistak, genero-segurtasuna eta -ekitatea bermatzeko. Gure herrian, dohaintzak Eibar-Ermua Gurutze Gorriaren bulegoetan eta Villa de Ermua dendan egin daitezke. Bizumen bidez ere lagundu daiteke, aplikazioaren "Eman" atalean, 01376 kodea eta pertsona bakoitzak egokitzat jotzen duen zenbatekoa txertatuz.

Jostailu horien onuradunak Ermuko eta Eibarko familiarik zaurgarrienak izango dira, eta herri bakoitzeko Gizarte Zerbitzuen lankidetzaren bidez identifikatuko dira. Ermuko eta Eibarko 230 haur inguruk Gabonetan ilusio berri bat jaso ahal izateko laguntza beharko luketela uste da, eta, beraz, kanpainak 700 jostailu berri inguru jasotzea espero du, ahalik eta familia gehienengana iristeko.

Ekimena ostegun honetan, abenduak 2, aurkeztu da, eta bertan izan dira Eibar-Ermua Gurutze Gorriko presidente Pedro Perez, Juan Carlos Abascal eta Jon Iraola alkateak, Beatriz Gamiz lehen alkateorde ermuarra eta Juan Maria Ausin Tandanakuy GKEko ordezkaria. Aurkezpenean, parte-hartzaileek helburu solidarioak dituen kanpaina honen garrantzia azpimarratu dute, Eibar eta Ermuko kalteberatasun egoeran dauden haurrek jokatzeko eskubidea bermatua izan dezaten.