‘El hombre del sótano’ eta ‘Cyrano’, Antzokiko asteko zinean

Aste Santua hemen da, baina Ermua Antzokiak ez du atsedenik hartuko opor hauetan. Ostegunetik asteartera bitartean lau film berriz gozatu ahal izango dugu gure herrian, zineklub saiotik hasita. Bihar, hilak 14, Flee zinta daniarra emango da, azken Oscar sarietan nazioarteko, animaziozko eta film dokumental onenaren sarietarako izendatua. Danimarkan bizi den errefuxiatu afganiar batek bere historia pertsonala kontatzea onartzen du, bere nortasuna ezagutarazten ez den baldintzarekin. Helburu hori lortzeko, Jonas Poher Rasmussen zuzendariak animazio estiloa erabiltzea erabaki du, protagonista babesteaz gain, bere istorioa indartzen duena. Flee jatorrizko bertsioan proiektatuko da, azpitituluekin, 20:30etik aurrera.

Zine komertzialeko programazioa larunbatean hasiko da, 19:30ean, Philippe Le Guayk zuzendutako El hombre del sótano thriller frantziarraren lehen emanaldiarekin. Parisen, jatorri juduko bikote batek bizi diren eraikinean duten soto osasungaitz bat saltzea erabaki du. Gizon arrunt bat, Fonzic jauna (François Cluzet), agertzen da lokala erostera. Egoerak ez dirudi inolaz ere ezohikoa, baina Fonzicek, holokaustoaren ukatzailea denak, sotoa bere bizileku iraunkor bihurtzen du. Bikotea salmenta bertan behera uzten saiatuko da etsi-etsian, baina arrakastarik gabe. Pixkanaka, gizonaren presentziak bikotearen bizitza aldatuko du. El hombre del sótano astelehenean ere eskainiko da, 20:30ean.

Asteko bigarren film komertziala Cyrano izango da, Joe Wrightek zuzendua eta Peter Dinklage eta Haley Bennett protagonista dituena. Bere garairako aurreratua, Cyrano de Bergerac edozein liskarretan murgiltzen da, bai bere hitzezko adimen biziarekin, bai bere ezpata zorrotzarekin dueluan. Baina, bere itxurak bere lagun handi Roxanne distiratsuaren maitasunaren duin egiten ez duelakoan, ez du bere sentimenduak adierazteko erabakirik hartzen, harik eta neska Christian xarmantaz lehen begiratuan maitemintzen den arte. Cyrano igandean izango da ikusgai 19:30ean eta asteartean 20:30ean.

Haurrentzako zinemari dagokionez, igandean arratsaldeko 17:00etan Orkestra lurtarra filmaz gozatzeko aukera izango dugu. Bizitzan ezer ez da erraza eta ez da nekerik gabe iristen, eta horretaz asko dakite Harkaitz Canoren izen bereko eleberriaren egokitzapena den umore eta musika zinta honetako protagonistek. Pertsonaiek arrakastara bidean biziko dituzten harreman eta abenturek ezin hobeto irudikatzen dute gizartea: Manu ameslaria da, Salegi manager bizizale eta prepotentea, Perfumetti anai erromantikoak, Aldika jakintsua eta Osoki bihurria, Presidentea izeneko ahuntza, eta pertsonaia dibertigarri eta original ugari ikusiko ditugu. Pelikulan musika eta umorea ikus ditzakegu, gure emozioak bideratzeko aliatu handiak. Ezberdina dena originaltasuna dela uste duen istorio bat da, eta erakusten du arrakasta lortzea ez dela altu iristea, baizik eta konpainia onean egiten jakitea, inoiz ametsak bistatik galdu gabe.