Fantasiazko eta umorezko zinea udako gauetarako

Aire zabaleko udako zine programazioa amaierara hurbiltzen ari da abuztuko laugarren aste honetan, baina oraindik pelikula ederrak ditugu ikusteko. Astelehen eta asteazken honetan bi zine saio berri izango ditugu: Errementari eta ¡A todo tren! Destino Asturias.

Emanaldiak doakoak dira, eta 22:00etan hasiko dira Orbe Kardinala plazan. Euria egiten badu, emisioak Santiagoren parrokia-elizako arkupeetan eskainiko dira.

Zinema saio hauek astelehen eta asteazkenero egingo dira abuztuaren 29ra arte.

Udako zine egitaraua

Astelehena 22: Errementari

Paul Urkijo Alijo zuzendari gasteiztarrak XIX. mendean girotutako fantasiazko film hau aurkezten du, eta Kandido Uranga, Eneko Sagardoy eta Uma Bracaglia ditu protagonista. 10 urte igaro dira 1833ko lehen Karlistalditik. Arabako herri txiki batean, Alfredo izeneko gobernuko komisario bat gertaera bat ikertzen ari da, eta bidean Patxi izeneko errementari arriskutsu eta bakarti bat bizi den lekura iritsiko da, basoko errementeria ilun batera. Inguruko baserritarrek lapurretekin, hilketekin eta deabruzko itunekin lotutako istorio ilunak kontatzen dituzte. Harik eta Usue izeneko neskato umezurtz batek errementeria misteriotsuan sartzea lortzen duen arte, Patxi Errementariaren atzean ezkutatzen den egia izugarria azaleratuz.

Asteazkena 24: ¡A todo tren! Destino Asturias

Santiago Segurak zuzentzen eta protagonizatzen du, Leo Harlemekin batera, komedia dibertigarri hau. Bertan Ricardo aita arduratsua ezagutuko dugu, bere semea Asturiaseko kanpamentu batera eramatea erabakitzen duena, gaueko trenean. Guraso batzuek proposatzen diote bere seme-alabetako batzuk ere bidaian eramatea; hala ere, ez dute uste azken minutuan Felipek, bi haurren aitonak, tipo bitxi eta arduragabe batek, lagunduko dienik. Trena Ricardo eta Felipe gabe abiatzen denean, umeak barruan dituela, aitaren eta aitonaren jazarpen zentzugabea hasiko da trena harrapatzeko, eta umeen bidaia zoroa, non nagusien aurrean inoiz egingo ez lituzkeen bihurrikeria guztiak egingo dituzten.