Debabarreneko Lurralde Plan Partzialaren diagnostikoa egiteko parte-hartze prozesu irekia

Eskualdeko erronkak, beharrak eta aukerak identifikatzeko parte-hartze bideak abenduaren 15ean irekiko dira, hilabetez. Eta hilaren 15ean eta 16an elkarrizketak egingo dira kalean, pertsonek bederatzi gai zehatzen inguruan duten iritzia jasotzeko.

Eusko Jaurlaritzako Lurralde Plangintza, Etxebizitza eta Garraio Sailak herritarren partaidetzarako prozesua ireki du hasierako diagnostikoa egiteko, Debabarreneko Lurralde Plan Partziala (LPP) idazteko balioko duena.

LPPk lurraldearen antolamendurako irizpideak zehazten ditu, kasu honetan Deba, Eibar, Elgoibar, Ermua, Mallabia, Mendaro, Mutriku eta Soraluze-Soraluze-Placencia de las Armas udalerrienak. «Prozesu luzea da hau, eta orain diagnostikoarekin hasiko da; herritarrei parte hartzera eta Debabarreneko etorkizuneko erronka, behar eta aukera zehatzei buruzko iradokizunak eta ideiak aurkeztera animatzen ditugu», adierazi du Miguel de los Toyos Lurralde Plangintza eta Hiri Agendako sailburuordeak.

Herritarrei elkarrizketak abenduaren 15ean eta 16an egingo zaizkie. Abenduko lehen asteko beste bi egunetan ere egin dira kontsultak eta galderak kaleetan. Halaber, abenduaren 15ean, arratsaldeko sei eta erdietan, hitzaldi bat izango da Eibarko Errebal aretoan. Egun horretan bertan, hilabeteko epea irekiko da kanal digitalen bidez parte hartzeko, urtarrilaren 15era arte (www.lurraldeplana-debabarrena.eus). Eusko Jaurlaritzaren Irekia kanalak (www.irekia.euskadi.eus) eztabaida irekia hartu eta planteatuko du eremu funtzional horretako erronka eta premia garrantzitsuenei, horien lehentasun-ordenari eta gure eskualdearen aukerei buruz.

Diagnostikoak herritarrek bederatzi gairi buruz dituzten ideiak jaso nahi ditu: ingurune naturala eta azpiegitura berdea, mugikortasuna, baliabide naturalak eta hondakinak, lurralde-erlazioa eta ekipamendu handiak, etxebizitza eta hiri-berroneratzea, jarduera ekonomikoa, ondarea eta nortasuna, klima-aldaketa eta osasuna eta inklusibotasuna eta euskara.