‘Vasil’ eta ‘As bestas’, asteko zine programazioan

Ermua Antzokiak zinema asteari ekingo dio, drama eta animaziozko lau film berrirekin. Egitaraua ostegunean estreinatuko da, Felix Viscarret zuzendariaren No mires a los ojos filmarekin. Paco Leon, Leonor Watling, Alex Brendemühl eta Juan Diego Botto dira Juan Jose Millasen izen bereko eleberriaren egokitzapenaren protagonistak. Damian kaleratu berri dute 20 urtez enpresa berean lan egin ondoren. Bere erreakzioak, haserre eta bortitz samar, bulegotik korrika irtetera eta aurkitzen duen lehen lekuan, furgoneta batean kargatutako armairu batean, ezkutatzera eramaten du. Armairua, Damian barruan dela, familia baten etxean uzten dute, eta gau hartan bertan, ustekabeko bulkada batek familiarekin geratzera eramaten du, itzaletik behatu eta mugituko den presentzia misteriotsu bat bezala. No mires a los ojos 20:30etik aurrera eskainiko da.

Zine komertziala larunbatean hasiko da, 19:30ean, Vasil filmaren lehen saioarekin. Avelina Pratek zuzendu du immigrazioari buruzko drama hau, Ivan Barnev, Karra Elejalde eta Alexandra Jimenezek antzeztua. Vasil argia da, karismatikoa, eta aparta bridgean eta xakean jolasten, baina kalean lo egiten du Bulgariatik iritsi zenetik. Alfredo arkitekto erretiratuak bere etxean hartuko du denbora batez, Luisa alabaren harridurarako. Bi gizonek ez dute ezer komunean, xakerako grina izan ezik. Desberdintasunak izan arren, Vasilek apurka-apurka Alfredok eraikitako hesiak apurtzea lortuko du. Izan ere, badu dohain bat: berarekin harremanak dituzten pertsonak betiko eraldatzea. Vasil astelehenean ere proiektatuko da, 22:00etan.

Asteko bigarren film komertziala As bestas izango da, Rodrigo Sorogoyenen azken thrillerra. Marina Foïs eta Denis Ménochet Antoine eta Olga dira, aspalditik Galizia barnealdeko herrixka batean bizi izan den bikote frantziarra. Bizimodu lasaia dute han, baina bertakoekin duten bizikidetza ez da nahiko luketen bezain idilikoa. Anta anai auzotarrekin izandako gatazka baten ondorioz, tentsioa hazi egingo da herrixkan, itzulerarik gabeko puntu batera iritsi arte. As bestas larunbatean 22:00etan eta igandean 19:30ean izango da ikusgai.

Haurrentzako zineari dagokionez, igandean 17:00etan Rabbit Academy: el gran robo de los huevos de Pascua animaziozko filma eskainiko da. Untxien eskolan Pazkoa iristear dago, eta urrezko arrautza magikoak erabakiko du zein izango diren untxi lider berriak. Baina Max aukeratu ondoren, urre koloreko arrautza beltz bihurtzen da.