Ermua Antzokiak bi drama, komedia bat eta animazio bat eskainiko ditu aste honetan

Ermua Antzokiak lau estreinaldi berri proiektatuko ditu aste honetan. Osteguneko zineklubak 'Broker' film luzea eskainiko du jatorrizko bertsioan, gaztelaniazko azpitituluekin, iluntzeko zortzi eta erdietatik aurrera. Hego Koreako ekoizpena da, Hirokazu Koreeda zuzendariarena, 129 minutukoa. Gau euritsu batean, neska gazte batek bere haurra eliza baten atarian uzten du. Jaioberria bi gizonek jasotzen dute, bertan behera utzitako haurrak lapurtzen baitituzte, tarifa bat ordaintzeko prest dauden gurasoei saltzeko. Cannesko Zinemaldian aktore onenagatik saria jaso du.

Zinema komertzialaren atalean, larunbat gaueko 10etan eta igandeko zazpi eta erdietan Maria Schraderrek zuzendutako 'Al descubierto' ekoizpen iparramerikarra ikusi ahal izango dugu. Benetako gertakarietan oinarritutako drama da. 2017an, New York Times-eko bi kazetarik Harvey Weinstein ekoizlearen sexu-abusuei buruzko ikerketa bat argitaratu zuten, eta, ondoren, #Metoo mugimendua geldi ezinari bide emanez mundu osoan.

Bigarren proposamen komertziala 'El viaje a París de la señora Harris' da, Anthony Fabianek zuzendutako komedia britainiarra. Harris andreak garbitzaile gisa lan egiten du 50eko hamarkadako Londresen. Christian Diorren goi-mailako joskintzako soineko batez maiteminduta, Parisera bidaiatzea erabakitzen du bat lortzeko. Ikusgai izanen dugu larunbateko zazpi eta erdietan eta asteleheneko zortzi eta erdietan, hurrenez hurren.

Azkenik, igande arratseko 5etan, familia eta publiko gazteentzat aproposa den 'Kun Food, una aventura deliciosa' animazioaz gozatzeko aukera izango da. Super Bao, baporean egindako ogitxoa, heroi handi bihurtzea du amets, eta, beraz, banda batekin bat egin eta gaizkiari aurre egitera irtengo da.

Informazio gehiago antzokiko mikrositean.