2026rako aurrekontuaren zirriborroak 27,1 milioi euro aurreikusten ditu

Ermuko 2026rako udal aurrekontuaren proposamena 27,1 milioi eurokoa da, 2025ean baino %5;11 gehiago. Aurrekontuaren zirriborroak proiektu eraldatzaileen inbertsioen alde egiten du, gure herria inklusiboago, berdintzaileago eta jasangarriagoa izan dadin. Tokiko Gobernuaren hitzetan, “ez da bat-bateko aurrekontua; ongizate kolektiboarekin kudeaketa arduratsu, aurrera begirako eta erabat konprometituaren emaitza baizik”. Taldearentzat “ez dira zifrak, koadroak edo ehunekoak bakarrik. Gure udalerriarekin eta bertako jendearekin dugun konpromisoaren isla dira. Egunero Ermua leku bidezkoagoa, inklusiboagoa eta dinamikoagoa egiten duten pertsonekin. Aurrekontuan jasotako euro bakoitzaren atzean gure "bizilagunen bizitza hobetzeko asmoa dago”, azpimarratu dute.

Aurrekontu horrek “gure gobernu-ekintzaren funtsezko bi zutabe indartzera dator: zerbitzu publiko sendoak eta kalitatezkoak, bai eta enpleguaren aldeko neurriak ere. Aldi berean, oso gurea den apustu bat berresten du: kultura. Identitate-, bizikidetza- eta sustraitze-elementua. Kulturak komunitatea egiten duelako, batzen gaituelako eta garena bizirik mantentzen duelako”, erantsi dute.

Erabileraren araberako kopuruak

9,7 milioi baino gehiago udal-egiturarako izango dira. Hau da, langile publikoetan inbertituko dugu, horiek baitira eskola, gizarte-zerbitzu edo kultura- edo kirol-jarduera bakoitzak profesionaltasunez eta zerbitzu-bokazioarekin funtzionatzea ahalbidetzen dutenak.

Beste 9,3 milioi ondasun eta zerbitzuetara zuzenduko dira, gure egunerokotasuna mantendu eta hobetzeko aukera ematen dutenak, Ermuko sare ekonomikoaren parte diren tokiko hornitzaile eta enpresa txikiei lagunduz.

Aurrekontu honen apustu nagusia inbertsio publikoa da, 2025arekin alderatuta %76 baino gehiago hazi baita. 2,9 milioi euro izango dira, gaurko eta gure etorkizunerako pentsatutako proiektuekin. Bide Berdea, Merkatu plaza zaharraren birgaitzea, Valerio terraza edo argiteria publikoaren hobekuntza ez dira soilik obrak, baizik eta herri jasangarriago, irisgarriago eta bizigarriago baterako apustuak.

Udal digitalizazioan, espazio komunitarioen birgaitzean, kirol eta gizarte ekipamenduetan eta energia efizientziaren hobekuntzetan ere aurrera egingo dugu, trantsizio ekologikoaren eta garapen jasangarriaren helburuekin bat. Hori plangintza zorrotz batetik egingo da, Eusko Jaurlaritza eta Aldundia bezalako administrazioen lankidetza baitugu, baita jarduera horien bideragarritasuna bermatuko duten baliabide propioak ere.

Aurrekontu honek berdintasunaren, inklusioaren, pobreziaren aurkako borrokaren eta gazteen enpleguaren erronka sozialei ere aurre egingo die

3,4 milioi baino gehiago gizarte-babeserako izango dira: gizarte-zerbitzuak, mendekotasunaren arreta, berdintasuna, haurrak, immigrazioa, enplegua eta etxebizitzarako. Adinekoei laguntzeko programak, larrialdietarako laguntzak, Emakumearen Etxea, berdintasun planak eta enplegurako prestakuntza indartuko ditugu, gazteei eta zaurgarritasun egoeran dauden pertsonei arreta berezia eskainiz.

Aurrekontuaren zirriborro honek aurrekontu parte-hartzaileen prozesuaren ondoriozko proposamenak ere jasotzen ditu.

Gure bizilagunek bozkatu dituzten ideiak – hala nola udalerriko ‘chill out' guneak prestatzea edo Valerio terrazaren birgaitzea– dagoeneko sartuta daude eta finantzaketa dute. Gobernatzea ez da bakarrik erabakitzea; entzutea eta behetik hasita eraikitzea da, herritarrekin, haien benetako beharrak kontuan hartuta eta Ermuko egunerokotasuna hobetzeko duten ikuspegia kontuan hartuta.

Ibilbide-orri argia eta koherente

Aurrekontu hau bat dator gobernu talde honek bultzatzen dituen proiektu estrategiko handiekin:

• Ermua berdintasunezkoa eta inklusiboa
• Ermua iraunkorra, digitala eta modernoa
• Nortasun industriala eta ehun produktiboa zaintzen duen Ermua
• Pertsonak erdigunean jartzen dituen Ermua

Justizia sozialean, birbanaketan, eskubideetan eta arlo publikoan eraldaketarako tresna gisa sinestsita egiten dugu aurrekontua horrela. Inor atzean uzten ez duen eta elkartasunetik, demokraziatik eta herritarren parte-hartzetik jarduten duen hiri batean sinesten dugulako. Horregatik, finantza-erantzukizunaren aldeko apustua egiten dugu: kontuak orekatuz, beharrezkoa ez den zorpetzea saihestuz dugu eta etorkizuneko inbertsio-ahalmena indartuz.

Gobernuak udal taldeei, gizarte kolektiboei, elkarteei, sindikatuei eta herritarrei eskatu die aurrekontu hauek ikuspegi kritiko baina eraikitzailearekin azter ditzatela, hobetzeko tartea dagoenaren jakitun. “Prest gaude entzuteko eta elkarrekin Ermua bidezkoagoa, gizatiarragoa eta berdeagoa eraikitzen jarraitzeko” esan dute.