Abian da Martxoaren 8ko kartel lehiaketa

Ermuko Udaleko Berdintasun Sailak eta Emakumearen Udal Kontseiluak martxoaren 8ko kartela eta irudia aukeratzeko lehiaketaren edizio berri bat aurkeztu dute. Aurten ere bi kategoria egongo dira: orokorra, M8ko kartelak eta programak ilustratuko dituen diseinu irabazleari 600 euroko saria emango diona; eta Ermuko ikastetxeetako ikasleei zuzendutakoa, aurreko edizioko parte-hartze handiari esker mantentzen dena eta 300 euroko saria eskaintzen duena.

Lanak otsailaren 12ra arte, astelehena, aurkeztu ahal izango dira, 15:00ak arte. Teknika librea da, parte-hartzaileen irizpidearen araberakoa. Baldintza nagusia da obrak emakumeen berdintasunaren, borrokaren eta parte-hartze sozial eta politikoaren ideia aldarrikatzailea irudikatzea. Horregatik, aurkeztutako diseinuek, gaiaren aldetik, dataren esanahia aipatu beharko dute nahitaez, datari buruzko edozein ikuspegitatik. Hala ere, baztertu egingo dira mezu iraingarriak edo bortitzak dituzten obrak, zentzu demokratikoari eta pertsona guztiei errespetuzkoak ez direnak.

Parte-hartzea 16 urtetik gorako pertsona guztiei dago irekita, banaka zein taldeka. Pertsona bakoitzak gehienez hiru lan aurkeztu ahal izango ditu, originalak eta argitaragabeak, beste lehiaketa batzuetan sarituak izan ez direnak. Pertsonako diseinu bat baino gehiago aurkezten bada, zenbakituta joan beharko dute.

Diseinuak 45x30 cm-koak izango dira gutxienez, eta 65x40 cm-koak gehienez, eta kartoi-luma gainean aurkeztu beharko dira, kristalik gabe. Euskarri informatikoan bakarrik aurkezten diren lanak ez dira lehiaketara onartuko: inprimatuta erreproduzitzea eskatzen da.

Lehiaketaren oinarrien xehetasun guztiak behean ikus daitezke, Dokumentuak atalean.

Bestalde, lehiaketara aurkeztutako lan guztiak martxo osoan zehar Emakumearen Topagunean egingo den erakusketa baten parte izango dira.