Debabarrenaren eskuzabaltasunagatik esker ona agertu du ‘Zaporeak’ GKEak

‘Zaporeak’ Gobernuz Kanpoko Erakundeak eskerrak eman ditu Debabarrena eskualdean bildu eta Lesbosko (Grezia) errefuxiatu-esparruetara bidaliko diren elikagai eta dohaintza ekonomikoengatik. Erronkan parte hartu duten 8 herrietako boluntarioek eta agintariek Urkotronik enpresan bildu ziren bart arratsean elikagaiak aurkeztu eta eskualdean jasotako babesa eta solidaritatea eskertzeko. Guztira 12 tona genero eta 10.000 euro bildu ziren dohaintza, zozketa, merchandisingeko artikuluen salmentaz eta martxoaren 29an Ermuan zerbitzatutako tuper solidarioaren artean. Ermuan arroz luzeko 2.400 kilo nildu dira eta larunbatean 300 tuper solidario zerbitzatu ziren.

Parte hartu duen udalerri bakoitzak hainbat produktu bildu ditu. Ermuan, Soraluzen eta Deban arroz luzea jaso dute; Eibarren, dilista pardina; Elgoibarren, garbantzu pedrosillanoa; Mallabian eta Mendaron, hodi-makarroia; eta, azkenik, Mutrikun, arrain-kontserbak. Eskualdeko establezimenduetan 8 afari bikoitz eta artelanak zozketatu dira. Zenbaki saridunak eta bakoitzari dagokiona ondoren: 4307 zenbakia, Sagarran afaria eta B.P. Aizpunek egindako arte lana; 4510 zenbakia: Eibarko Kasinon afaria eta E.Orozek egindako lana; 5880 zenbakia: Salegin afaria eta L. Kareagak egindako lana; 3098 zenbakia: Baratzen afaria eta M. Martinek egindako lana; 0679 zenbakia: Belaustegin afaria eta E. Egurenek egindako lana; 2273 zenbakia: Kontenten afaria eta A. de la Torrek egindako lana; 5528 zenbakia: Bulebun afaria eta E. Galarzak egindako lana; 2277 zenbakia: Piperren afaria eta M. Zanguituk egindako arte lana; 3290 zenbakia: Landan afaria eta M. Barrenak egindako lana eta azkenik 5116 zenbakiari: Kiskan afaria eta Y. Capelok egindako lana egokitu zaio.

Erronkan bildutako produktu guztiak Greziako Lesbos uhartera bidaltzen dira, eta han babesten dira gerratik ihesi doazen pertsonak. Zaporeak sukaldaritzan aritzen da, eta egunero banatzen ditu elikagai horiekin prestatutako 3.000 anoa. Horrez gain, astean 7.000 litro esne eta 2.500 kilo fruta ematen ditu, dohaintzen diruarekin bertatik bertara erosten direnak.