Eskola materiala herriko dendetan erosteak saria du Ermuan

2024/2025 ikasturtea hastear da jada, eta horrekin batera, iritsi da eskola-materiala erosteko unea. Eskolara eta ikasketetara itzultzeko motxila betetzea ahalegin ekonomiko handia izan ohi da familientzat; hori dela eta, Ermuko Udalak, bosgarren urtez jarraian, 90 euro eskainiko ditu ikasle bakoitzeko, erosketak tokiko dendetan egin ahal izateko irailaren 1etik urriaren 31ra bitartean, biak barne.

Ekimen honen helburu nagusia udalerriko dendetan erosketak sustatzea da, eta, aldi berean, ikasturte bakoitzaren hasieran familiek izan ohi dituzten gastuengatiko zama arintzea.

Laguntza horiek gehienez 90 eurokoak izango dira ikasle bakoitzeko, eta eskola-materiala (testuliburuak izan ezik), arropa, oinetakoak, kirol-materiala, material informatikoa, betaurrekoak eta lentillak erosteko gastuak ordaindu ahal izango dituzte.

Udalbatzak aho batez onartu ditu laguntza hauek zehazten dituzten oinarriak, eta lau lerrotan banatzen dira:

• 2022ko urtarrilaren 1etik 2024ko urriaren 31ra bitartean jaiotako haur ermuarren gurasoak edo legezko tutoreak. Udalerriko biztanleriaren %1a adin-tarte horretan dago.
• 2008ko urtarrilaren 1etik 2021eko abenduaren 31ra bitartean jaiotako haur ermuarren gurasoak edo legezko tutoreak; Eustaten arabera, ermuarren %11,52 dira.
• 16-25 urte arteko ikasleak, 1999ko urtarrilaren 1etik 2007ko abenduaren 31ra bitartean jaiotakoak. Ikasleak adingabeak badira, gurasoek edo legezko tutoreek egin beharko dute eskaera. Eustaten datuen arabera, Ermuko biztanleen %9,5ek 16 eta 25 urte bitartean ditu, eta adin-tarte horretako gehienak ikasten ari dira. Hori dela eta, Ermuko Udalak dirulaguntza lerro bat aurreikusi du 16 eta 25 urte bitarteko pertsonentzat, baldin eta ikasketa arautuak edo okupazionalak, masterrak edo doktoregoak ikasturtearen antzeko iraupenarekin egiten ari badira edo helduen hezkuntzako (HHE) ikastetxe publikoetan ikasten ari badira. Prestakuntza osagarria kanpoan geratzen da (hizkuntzak, informatika erabiltzaile-mailan, gidabaimena, etab.).
• 1999ko urtarrilaren 1a baino lehen jaiotako langabeak. Kasu horretan, pertsonak langabezian egon behar dira eta ezin dute inolako prestaziorik jaso. Aurreko laguntza lerroan bezala, egiten ari diren ikasketak arautuak edo okupazionalak, masterrak edo doktoregoak, ikasturtearen antzeko iraupenarekin, izan beharko dute, edo helduen hezkuntzako (HHE) ikastetxe publikoetan ikasten ari badira. Prestakuntza osagarria kanpoan geratzen da (hizkuntzak, informatika erabiltzaile-mailan, gidabaimena, etab.).

Laguntza hauek jasotzeko, Ermuan gutxienez 6 hilabetez jarraian erroldatuta egon beharko da. Sei hilabetetik beherako pertsonek Ermuan erroldatuta egon beharko dute jaiotzen direnetik.

Laster zabalduko da eskaerak aurkezteko epea

Eskabideak aurkezteko epea eta informazio zehatza Egoitza Elektronikoan egongo dira eskuragarri datozen asteetan, Laguntzak, Bekak eta Dirulaguntzak atalean. Epea zabaltzen denean webgune honen bitartez iragarriko da.

Aurreko urteetan bezala, 90 eurorainoko laguntzak eskuratu ahal izateko, Ermuan irailaren 1etik urriaren 31ra bitartean egindako gastuen fakturak aurkeztu beharko dira, dirulaguntzaren titularraren izenean, eta bertan argi eta zehatz jasoko dira erositako produktuak. Halaber, libretaren titulartasunaren datuak egiaztatzen dituen dokumentu bat, matrikularen egiaztagiri bat (17 urtetik gorakoen kasuan) eta SEPEren ziurtagiria (langabeen kasuan) eskatuko dira.

Eskaerak eta atxikitako dokumentazio guztia Ermuko Udalaren egoitza elektronikoan aurkeztu ahal izango dira, eguneko 24 orduetan, edo Abiapuntu bulegoan, astelehenetik ostiralera 08:00etatik 15:00etara, epea irekitzen den unetik aurrera.