Rocio Ama Birjinaren omenez Erromeria ospatuko du Andaluziako Zentroak asteburuan

Ermuko Andaluziako Kultur Etxeak Rocioko Ama Birjinaren omenezko erromeria ospatuko du asteburu honetan. Egitaraua gaur ostirala, ekainak 20, arratsaldeko 19:00etan hasiko da San Pelaio parkean pintxopotearekin. 19:15ean dantza eta kantu emanaldiak hasiko dira: "Aire Andaluz", "Voces del pueblo" eta ‘Eva dantza akademia’ taldeak jardungo dute. Jardunaldia 22:00etan amaituko da, Ama Birjinari harrera eginez eta Salbea kantatuz.

Biharko larunbatean, 10:00etatik aurrera, Zentroko kideek Ermuko kaleak zeharkatuko dituzte Rocioko Ama Birjinaren irudiarekin, Diputazio kalean duten Andaluziako Zentroaren egoitzatik abiatuta Betiondoraino. Eguerdian, meza ospatuko da Barakaldoko "Axaerquía" abesbatzarekin. 13:00etan dantza erakustaldia izango da Barakaldoko "Malaka" taldearekin, eta 14:00etan, bertaratutako guztiek bazkari bat egingo dute.

Bazkalostea egin ondoren, 18:00etan, sevillanak dantzatzeko musika izango da. Jaia Ama Birjina Andaluziako zentrora bueltatzean amaituko da.

Programak Ermuko Udalaren eta Andaluziako Juntaren laguntza du. Azpian, edizioaren kartela utziko dizuegu.