Inauterietarako kartel-lehiaketa oraindik zabalik

Udal kultura sailak zabalik mantentzen du aurtengo Inauteriak iragartzeko erabiliko duen kartel-lehiaketa. Hortaz, oraindik denbora dago marrazki eta proposamenak aurkezteko. Lehiaketaren irabazleari 450 euroko saria emango zaio, eskudirutan. Zirriborroak sailaren bulegoetara eraman edo postaz bidali daitezke otsailaren 9ra bitartean. Postaz bidaliz gero, jarri behar den helbidea ondokoa da: Komentukua kalea z/g, 48260 Ermua (Bizkaia).

Kartela egiteko teknika librea eta egileak berak aukeratzekoa da. Deialdia arautzen duten oinarrietan xedatutakoaren arabera, lanek neurri zehatz batzuk eduki behar dituzte. Tamainarik txikiena 42x30 cm dira eta handiena, berriz, 48x33 cm-ra artekoak. Gaiari dagokionez, autoreak erabaki behar du Inauteriak zein ikuspegitik landu, baina nahitaezkoa da, jai horren atalen bat adieraztea. Halaber, ‘Ermuko Inauteriak 2006’ esaldia agertzea ere, derrigorrezkoa da. Lanak euskarri zurrun batekin babestuak aurkeztu beharko dira, azalean 2006ko Inauteriak esaldia idatziz. Barnean, egilearen datuak jasotzen dituen txartela sartuko da.