Kontu kontariaren saio entretenigarria

Rosa Martínez ipuin kontalariak bere ipuin eta panpinekin gozarazi zuen aurreko larunbatean udal liburutegira bildu ziren 3tik 8 urtera bitarteko umetxo taldea. Guztira azken larunbatean hirurogei bat ume elkartu ziren Arratsaldean kontu kontari ekimenaren ikasturte honetako hirugarren saiora.

Martínezek, besteak beste, ondoko ipuinak kontatu eta interpretatu zituen: ‘Elefante jakinguratsua’, ‘Guillermina dortoka’, ‘Perla txakurra’, ‘Ilargiaren lapurra’ eta ‘Lehoia eta arratoia’. Entzuleen gozamenerako kontalaria bere istorioetako hainbat protagonistekin batera etorri zen Ermura, esaterako Guillermina dortoka eta Perla txakurtxo emeaz.

Saio hori aurtengo ikasturteko hirugarrena izan da. Ekimena hileko lehen larunbatero gauzatzen da haurrentzako udal liburutegian. Ekimenak bi helburu nagusi ditu, batetik, liburutegia aisialdi leku gisa bultzatzea eta, bestetik, ahozko tradizioan oinarriturik irakur zaletasuna bera piztea.

Hurrengo saioa apirilaren 2an, ‘Haurrentzako liburuaren egunean’ egingo da, apirilaren lehen larunbata Aste Santuko jai egunetan tokatuko delako.