M. Ángel Blanco oroitzeko ekitaldi herritarra

Ermuko Udalak eta herriak Miguel Ángel Blanco gogoratuko dute bere erailketaren hamargarren urteurrenean. Udalak ekitaldi herritarra antolatu du datorren astearterako. Ekitaldi horren leloa ‘Askatasunerantz. 10 urte Miguel Angel gabe’ izango da. Datozen egunetan Miguel Angel Blanco Garrido zinegotzi gaztea bahitu eta erail zutela hamar urte beteko dira. Ekitaldi hori iluntzeko bederatzietan egingo da, San Pelaion, terrorismoaren biktimak omentzeko Ibarrolak egindako eskulturaren ondoan. Ekitaldian erakundearen adierazpen bat irakurriko da. Adierazpenaren testua herriko Udalbatza osatzen duten alderdi politiko guztiek EB-B; EAJ-PNV, PP eta PSE-EE-PSOEk adostu eta aho batez onartu dute egin berri den Osokoaren Bilkuran. Ekitaldian musika eta oroimenerako tartea egongo dira.

Aurtengoan hamargarren urteurrena beteko da, data esanguratsu, giro politiko nahasi eta une korapilatsuan ailegatzen dena. Hori horrela, herriko Udalbatzak 1997ko uztaileko mobilizazioak eragin zituzten arrazoi nagusiak berreskuratu nahi ditu: herritarren batasun eta adostasuna, kalera irten eta batera ‘askatasuna’ aldarrikatzeko eta batasun demokratikoa, ikur eta alderdien gainetik, ETAri Miguel Angelen bizia errespeta eta aske utz zedila eskatzeko. Alkatetzako idazkaritzak prentsa oharra luzatu eta zabaldu du, zeina guk hemen eskaintzen dugun.