Hirigintzako hainbat aldaketek ikasturte berrian eragingo dute

Ikasturte berriaren hasierak berarekin ekarriko ditu hainbat aldaketa eta berrikuntza. Berrikuntza horiek gehien bat eta nagusiki hirigintza alorrean egin diren obrekin zerikusia dute, hezkuntza zerbitzu eta ikastetxe gehienak kokatzen diren auzoan egin baitira; Ongarain hain zuzen ere. Nobedaderik behinena San Pelaio ikastetxeak bere eraikin berria estreinatuko duela da, zeinak astelehenean zabalduko dituen bere ateak. Eraikina bitxia da oso, bere estetika eta pintura berdeaz gain, arkitektonikoki erabilerarako pentsatu eta egokitua izan eta berritzailea delako. Eraikina Federico Soriano eta Dolores Palacios arkitektoek diseinatu dute. Bikoteak egindako lanean artean, Bilboko Euskalduna jauregia eta Foru Aldundiko Ogasun sailaren egoitza bereak dituzte. Ikastetxe berriari eta egileei buruzko erreportajea argitaratu berri du arkitekturan den ‘El Croquis’ tituluko aldizkari aditu eta berezituak. Ikasturte berriak beraz, eraikin eta instalakuntza berri eta erosoak gozatzeko aukera ekarriko dizkie bertako ikasle eta irakasleei.

Nolanahi ere, eraikin berria nobedaderik handiena izan arren, ez da bakarra izango. Ongarai auzoan kokatuta dauden ikastetxe guztietara joaten diren ikasleek egin diren sarbide berriak erabiltzeko aukera izango baitute. Udal hirigintza alorrak uda honetan jarduera garrantzitsu bat gauzatu du bertan, zonaldea berrantolatzeko xedez. Aldaketak Gure Etxea, Ongarai Eskola eta Anaitasunari eragingo diote, ezker eta eskumano aldeetan jardun baita. Ezkerreko espaloia altxatu, zabaldu eta osorik berria jarri baita. Alde horretan zeuden pezoi eta barandak ezabatu egin dira. Bidea bera era ukitu izan da, eskuma aldea nasaitzeko mendiari zati berri bat kendu zaiolarik. Horri esker, orain ibilgailuak lerroan utzi ordez baterian aparkatu ahal izango dira, leku kopurua gehituz. Guztia borobiltzeko, hemendik gutxira baranda, paperontzi eta farol berriak jarriko dira. Elementu horiek ipinita behar lituzkete, baina obra zertxobait atzeratu egin da udako eguraldi kaskarragatik eta hainbat hornitzaile oporretan izanagatik.

Zonalde guztia asko aldatu izan da urte baten buruan. Ongarai eskolako instalazioak eta Gure Etxean dituen berriak lotzeko pasagunea eta horren estaldura ere bukaturik daude. Gure Etxea eraikina goitik behera eraberritu izan delarik, barrutik nahiz kanpotik. Azkenik, aipatu, Anaitasuna ikastolan ere obrak egin direla, Institutukoek beraientzako sarrera berria egin baitute. Zentroko obra guztiak oraindik amaitu gabe daude.