San Antonioko eta Abeletxerako lotura guneak asfaltatzeko lanak amaitzear

634 errepide nazionalean -San Antonion- eta Abeletxe bide berrirako lotura guneak asfaltatzeko lanak bihar amaituko dira.Gaur izango da zeregin honetan ematen den laneko bigarren gaua. Lanak gauez egiten dira trafikoari eragozpen gehiagorik ez sortzeko. Bart gauean eta goizaldean 634 errepide nazionaleko zati bat asfaltatu eta pintatu da. Hain zuzen ere, Gipuzkoa Etorbideko 8. eraikinetik 12ra bitarteko zatia. Gaur gurutzearen elkargunea eta trenbide azpiko –tuneleko- zatia asfaltatuko da. Langileek gaueko hamarretan hasiko dira lanean eta horien lanjarduna, hurrengo eguneko seiak bitartean luzatuko da.

Asfaltatze lana “Compañía Vasca de Asfaltados” izeneko enpresak egiten dihardu, obraren esleipenduna den ''Izelaieta'' Aldi-baterako enpresa elkarteak hori kontratatu baitu. Gaur egun ezagutzen dugun Izelaietako sarbidea behin betirako itxita gera daiteke datozen egunetan, obraren eboluzioaren arabera.