Palako txapelak Ermuan geratuko dira, beste urte betez

Miguel Vidaurrek eta Roberto Arrartek jantzi dituzte beste behin herriko pala txapelketako txapelak, bart iluntzean jokatutako partidan Ellakuria-Unda bikotea 35-27 emaitzaz gailendu eta gero. Atzokoan lortutakoarekin, jada, laugarren txapela jantzi dute, beste horrenbeste urte jarraian. Markagailuak horrenbesteko estutasunik agertzen ez duen arren, partida oso gogorra izan zen bikote biak oso maila ona eta parekatua agertu baitzuten. Ermuarrek aurretik izan baziren ere, haibatean tartea murriztu eta ondotik jarraitu zieten bisitariek. Jokoaren arabera markagailuak alde batera nahiz bestera egin zezakeen arren, azkenean herrikoek irabazi zuten. Beraien alde, frontoia eta jarraitzaile sutsuak izan ziren.

Arratsaldeari hasiera eman zitzaion, bigarren mailako finalarekin. Horretan, Mertxan eta Lorente basauriarrak mendean hartu zituzten Lander eta Eneko eibartarrak, 35-28 emaitzaz. Basaurikoak txapela jantzi eta beren herrira eraman zuten. Markagailuak adierazten duenez, partdi hau ere oso parekatuta egon zen, kirolariek maila ona erakutsi zutelako. Partidak Orbe Kardinalaren plazako frontoian jokatu ziren, arratsaldeko sei eta erdietan hasi eta ia gaueko hamarrak bitartean. Azkenengoa amaitzerako, ia erabat ilun zegoen. Datorren urtean gehiago ikusi nahiz jokatzeko parada izango dugu!