Kolonbiako dantzak udal liburutegiaren eskutik

Udal liburutegiak Kolonbiako dantzen erakustaldia eta horiek dantzatzen ikasteko hastapen tailerra antolatu du ’Munduko paisaiak’ ekimenaren barne. Parte hartu nahi izanez gero, aldez aurretik izena eman behar da, doakoa izan arren, lekua murritza baita.

Euskal Herrian dauden Kolobianoen ASOCOLVAS elkarteko hamasei dantzari Ermura etorriko zaizkigu herrialde hartako dantzak hurbiltzeko, bertako kulturaren adierazpide bat baita. Dantza erakustaldia egiteaz gain, ‘sanjuanero’ eta ‘cumbia’ bezalako hango dantza tipikoenen oinarrizko pausuak erakutsiko dizkigute.

Erakustaldi eta tailerra bi saioetan gauzatuko da. Lehena datorren ostiralean, azaroaren 6an Lobiano Kulturgunean egingo da eta bigarrena zortzi egun beranduago. Esan bezala, tailerra doakoa den arren, aldez aurretik izena ematea eskatzen da, lekuak mugatuak baitira. Izena emateko hainbat aukera daude, liburutegira bertara joatea edo e-posta bidez biblioteca@udalermua.net helbidera mezua bidaltzea edo bertako 943179212 telefono zenbakira deitzea.