Aukera Berdintasunerako sailak, ingurumenaren aldeko jarrera aktiboa du

Urteroko legez, martxoa badator eta horrekin batera hilaren zortzigarren egunean ospatzen dugun Emakumeen Nazioarteko Eguna. Aurtengoan ere, Aukera Berdintasuneko Sailak egun horren harira Berdintasun Kontseiluarekin elkarlanean gauzatuko duen programa iragartzeko esku-egitarauak eta kartelak argitaratuko ditu. Programa hori datozen egunetan emango dugu ezagutzera osorik zehaztu eta moldiztegitik etorri ahala. Nolanahi ere, hemendik aurrera eta hobekuntza gisa egitarauaren liburuxka nahiz kartelak paper birziklatuan argitaratuko dira.

Aukera Berdintasunak ingurumen sailaren proposamena bere egin du eta, esan bezala, egitaraua iragartzeko foiletoak nahiz kartelak 100% birziklatutako paperean kaleratuko dira. Paper hori, kontsumitu eta gero errekuperaturiko zuntzekin ekoiztu da berriz, klororik edo zuritzailerik erabili gabe. Mota horretako papera egiteko baliabide gutxiago gastatzen da eta negutegi efektua sortarazten duten gas kopuru gutxiago isurtzen da airera.

Horrela egin da, praktika on bati leku egiten zaio, ingumen eta jasangarritasunaren irizpideak barneratuz udaleko gaien kudeaketan. Erabaki hori sailak argitaratzen duen edozein gauzatan mantenduko du aurtengo urtealdian. Erabaki honek jasangarritasuna lortzeko Ermuko Agenda 21 programaren ekintza planak zehazten duen 12. lerro estrategikoa betetzera dator. Ingurumena errespetatu eta babestea, guztion zeregina da.