Ez dazagun aitzakiarik bilatu!

Titulu hori aukeratu du udal liburutegiak haur literaturan dauden tabuak ezagutzera emateko argitaratu berri duen irakurketa gidan. Aipatu gida horren hitzaurrea eta baita bertara bildu diren lanen aukeraketa Txabi Arnal idazle ermuarrak egin du. Gida horrek duen xedea tresna baliagarria izatea da, helduok tabutzat jotzen ditugun hainbat gaiei buruz haurrekin nola tratatu behar ditugunerako.

Gidak hamabost orrialde ditu eta horietan arrazismoa, bakardadea, beldurra, bullying-a, minusbaliotasuna, gezurra, heriotza, nortasun sexuala, haur marjinazioa edo horienganako abusuak bezalako gaiak jorratzen dituzten liburu, ipuin eta irakurketak biltzen dira. Horiez guztiez gain, ekologia, adiskidetasuna, mugarik gabeko amodioa, adopzioa edo familia eredu berria.

Gida horren argitalpena erdibana ordaindu dute Eibarko eta Ermuko udalek. Horrez gain, zerbiztu biek elkarlanean jardunez Txabi Arnalek emango dituen hitzaldiak antolatu dituzte, horietan gida eta bertan proposatzen diren aukera eta baliabideak ezagutzera emango direlarik.

Txabi Arnal jaiotzez ermuarra da. Haurrei zuzendutako hainbat lan argitaratu ditu publiko horrentzat argitaratzen dituzten hainbat etxeekin, irakurleen harrera oso ona eta ospea lortu duelarik. EHUko irakaslea da eta Arabako campusean lan egiten du, irakasle-eskolan.