‘Santixauak’ ofizialki bihar hasiko dira

Santiago Apostoluaren omenez ospatzen ditugun herriko jai nagusiak eta arrazoi horrekin prestatutako programa ofizialari hasiera emango zaio bihar arratsaldean. Aurtengo jaiak hastear daude, nahiz eta egun eta jarduerarik garrantzitsuenak betiko legez uztailaren 24tik 27ra bitartean gauzatuko diren. Nolanahi ere, giroa berotzen joateko, bihartik hasi eta patroiaren bezperara eta egun nagusira arte ekintza ugari izango dira bata bestearen jarraian. Ohiturari jarraiki, programari herriko txaranga eta elkarteetako kideek emango diote hasiera, lagunen arteko lehiaketa eta jolasekin. Aurtengo edizioan eta oraingoz hamazazpi talde dira jokoetan parte hartuko dutenak. Hori horrela, bihar arratsaldeko 7etan eta herriko plazan hasiera emango zaie soka-tirako saioei. Gauean ere, izango da zerikusia, ‘Betto Snaypek ’ hip-hop kontzertua eskainiko baitu, Valdespina Markesaren parkean hamar eta erdietatik aurrera. Jarduera, Komite Internazionalistak antolatu du.

Santixauetarako gero eta gutxiago falta da. Kalean, nabari da. Herritarrak festarako irrikan gaude. Guztion ahotan ez da besterik entzuten eta nabaria da txarangen prestaketa lanetan eta play-back lehiaketarako entseguetan. Etzi, txarangen arteko jokoek aurrera jarraituko dute, artaburu lasterketarekin eta pepinoaren probarekin. Gauez, Kukubiltxo taldeak ‘Mortimer’ tituluko kale ikuskizuna antzeztuko du, Valdespinako Markesaren parkean. Ekitaldia Euskal Birusak antolatu du.

Jarduera eta horiek ordutegi zehatza jakiteko, kontsultatu programa ofiziala.