Ziklo-kroseko proba Betiondon, Jose Agustin Fuentes memoriala

Ermuko Udalaren Ziklo-kroseko Sari Nagusia, Jose Agustin Fuentesen memoriala, korrituko da igandean gure herrian. Proba Ermuko Txirrindulari Taldeak antolatu du eta Beti Ondoko zirkuituan jokatuko da. Lasterketa hau antolatzeko udal kirol zinegotzigoak diruz lagundu du. Lasterketako ibilbideak ia 2.4oo metroko luzera izango du. Zirkuitua mistoa da, barne asfaltoa, bidea, belartza eta oinez ibiltzeko guneak nahasten baititu. Saioari hasiera emango zaio goizeko hamarretan. Ordu horretan 30, 40 eta 50 urtetik beherako txirrindulari maisuek –gizon nahiz emakumezkoek- korrituko dute.

Kadeteak ordu bete beranduago ekingo diote lanari eta juniorrak eguerdian. Karrerarik garrantzitsuena, 23 urtetik beherakoentzat eta elitekoentzat arratsaldeko ordu 1ean aterako da. Kategoria honetan estatuko korridore espezialista onenen parte hartzea espero da. Euskaltel ekipo profesionalean ditugun ermuarrak, Aitor Hernándezen eta Aitor Galdósen parte artesa espero da. Eta baita Peio Goikoetxea eta Roberto Tesouro ermuarrak ere bai. Horiez gain, beste kategorietan ere izango dira ermuarrak, esaterako, Xabier Goikoetxea juniorra eta Victor Cordón kadetea. Lasterketa UCI delakoaren Txirrindularitza araudiarekin, Espainiako txirrindularitza Federazioko araudi teknikoarekin, eta aplikagarri zaizkion gainerako guztiekin bat korrituko da. Izen-emateak proba bakoitzari hasiera eman aurretik egin ahal izango dira, Beti Ondon bertan.