Ermua eta Mallabia lotzen duen BI-3302 errepidea pintatzeko lanak gauez egingo dira

Ermua eta Mallabia lotzen duen BI-3302 errepidea pintatzeko lanak gaur gauean egingo dira, Hiritarren Segurtasunerako udal alorrak jakitera eman duenez. Pintatze lanak Aritzmendi pilotalekutik Microdeco enpresara arteko zatian egingo dira, hau da Urtia industrialdera arte, gure udalerriko mugen barne. Lan horiek koordinatzeko bertan udaltzaingoaren agenteak izango dira, txandaka pasa edo bestelako gauzaren bat behar denerako. Lanak gaur gaueko hamarretan hasiko dira eta biharko egunean, ostiralaren arratsaldeko hiruretan bukatzea aurreikusita dago. Udaltzaingoko bozemaileak herritarroi lanak izango direla kontutan izateko, horiek gauzatzen laguntzeko eta arretaz gidatzeko eskatu digu ermuarroi eta, oro har, gidarioi. Eragozpenik gutxien eragiteko asmoz, lanak gauez egingo dira. Nolanahi ere, eragozpenak barkatzeko eskatu digute.

Pintatze lanak noranzko biak banatzen dituen lerroa, nahiz alboan daudenak barne hartuko ditu, eta baita adierazitako tartean dauden zebra bideak, oinezkoen babesguneak eta bidearen alboetan dauden aparkalekuak ere. Zeharkaleko errotondatik Aitzmendira arteko zatia ez da momentuz pintatuko, bertan Uvescaya SMak (BM supermerkatua jartzeko) egiten ari den obrak bukatu artean.