Xakean goizez eta Kontu kontari arratsaldez

Hileko lehen larunbata guztietan egin legez, udal liburutegiak jarduera bikoitza izango du bihar. Goizeko ordutegian xakearekin loturiko ekimen bat, eta arratsaldean ipuinekin zerikusia duen beste bat.

Goizean, xake zaleek bertan bildu eta jokoaren inguruko arauak, hasiera moduak, zalantzak, estrategiak eta mahai-joko honen inguruko askoz gauza gehiago argitu eta landu ahal izango dute. Guzti horretan laguntzeko eta aholkatzeko Ermuarrak Xake Taldeko kideak izango dira. Xake jarduera 12:30etatik ordu 2etara bitartean egingo Haurrentzako Aretoan.

Xake zaleei edo ikasi nahi dutenei horretan jarduteko espazio berria eskaini nahi zaie. Proposamen irekia da adin guztietakoentzat, haur, gazte nahiz helduek parte hartu dezaketelarik. Batzuk jokoan aritzearekin nahiko izango dute eta beste hainbatek begiraleen aholkuak nahiago izango dituzte.

Arratsaldean, bost eta erdietatik aurrera, hileko lehen asteburu honetan ‘Hala bazan ala ez bazan…’ izeneko ekimena egingo da, Zurrunka Antzerki Taldekideen eskutik 3 urtetik 8ra bitarteko umetxoentzat. Saioa euskaraz egingo da. Antolatzaileek parte hartzaileei puntualtasuna eta isiltasuna eskatzen diete, etenik ez sortzeko.

Hemendik aurrera hileko lehen larunbata guztietan jarduera bikoitza egingo da udal liburutegian. Hurrengo hitzordua, martxoaren 3an izango da.