Irakurle-kluben edizio berria, hastear dago

Urrian hasiko dira Ermuko Udal Liburutegiak eskaintzen dituen adinez nagusiendako bi irakurle-klubak, bata euskaraz eta bestea gaztelaniaz.

Aldez aurretik liburu edo irakurgai bera irakurri duten 15 edo 20 lagunek osatzen duten irakurle-kluba. Bileretan komentatu, iritziak eman, irakurketan bizitakoa adierazi eta obraz, gaiaz eta idazleaz hitz egiten da, topaketa hauek ikasteko eta sozializatzeko gune bihurtuz. Saioak Txomin Magdalenak dinamizatzen ditu, Durango eskualdean dauden beste hainbat irakurketa klubetako koordinatzaileak.

Euskarazko irakurle-kluba hilaren lehen astelehenean bilduko da, 19:30etik 21:00etara, Lobiano Kultur Gunean. Lehenengo saioa urriaren 1ean izango da, eta Hasier Etxeberriaren “Eulien bazka” liburuaz mintzatuko da.

Gaztelaniazko irakurle-kluba hilaren lehen asteazkenetan bilduko da, 19:30etik 21:00etara, Lobiano Kultur Gunean. Lehenengo saioa urriaren 3an izango da, eta taldekideek irakurri behar duten libura Eloy Morenoren “El bolígrafo de gel verde” liburua da, hori izango baitu mintzagai.

Jarduera doakoa den arren, aldez aurretik izena ematea eskatzen da, onar daitekeen partaide kopurua mugatua delako. Interesa duzuenok, datuak emateko pasa udal liburutegitik, bertako 943179212 telefono zenbakira deitu edo bertako biblioteca@udalermua.net e-posta ontzira idatzi.