Juanita Ibaibarriaga Literatur eta erreportaje lehiaketaren XIX. edizioa abian

Udal Euskara Sailak Juanita Ibaibarriaga literatur eta erreportaje lehiaketaren XIX. edizioa aurkeztu eta zabaldu du. Lehiaketaren xedea ermuarren artean euskaraz idazteko zaletasuna sustatzea da. Aurtengo deialdiak saritan 600 euro banatuko ditu. Lehiaketan parte hartu ahal izateko bi modalitate daude. Lehen modalitatea herriko haur guztiei zabalik dago eta bereziki LHko 3,4, 5 eta 6 mailako eta DBHko lehen eta bigarren mailako ikasleentzat. Modalitate honetako irabazleari 40 euroko sari bana emango zaio erosketa txarteletan, Ermuko Merkatarien Elkarteko dendetan truka dezan. Atal honetan gaia librea da eta ez da eskatzen gutxieneko luzerarik.

Bigarren modalitatean, berriz, nagusien lanak bilduko dira. Kasu honetan, idazlana erreportaje bat izango da, barne har ditzaketelarik elkarrizketak, aipamenak, dokumentuak, edo interesgarritzat jotzen den edozein material. Lanaren luzera 4600 eta 5600 karakter artekoa izango da eta derrigorrez Ermua edo ermuarrekin lotura izan behar du gaiak. Lan onenak 360 euro eskuratuko ditu.

Lanak udaleko Euskara zerbitzura, Lobiano Kulturgunera zein Udal Liburutegira eraman edo euskara@udalermua.net korreo elektronikora bidali behar dira, azaroaren 8a baino lehen. Idazlana kartazal handi batean sartuko da, egilearen izenik gabe. Barruan eta kartazal txikiago eta itxi batean egilearen izen-abizenak, adina, helbidea eta telefonoa erantsiko dira. Sariak abenduaren 3an, euskararen egunean banatuko dira Udal Liburutegian eta Webgune korporatibo honetan izango dira ikusgai.